यामाहा आरएक्स१०० किन बन्द भयो, यस्तो छ लोकप्रियताका कारण

यामाहा आरएक्स१०० सबैभन्दा लोकप्रिय मोटरसाइकल मध्ये एक हो । यामाहाले सो १०० सीसी बाइक बेच्न बन्द गरेको वर्षौं भइसक्यो तर अहिलेसम्म पनि यसको क्रेज घटेको छैन ।

आरएक्स१०० को डिजाइन निकै आकर्षक थियो । यसको स्लिम बडी, सानो ट्याङ्की र लामो सिटले यसलाई अन्य मोटरसाइकलभन्दा फरक बनाएको छ । सो बाइक धेरै स्टाइलिश र स्पोर्टी देखिन्थ्यो र ड्राइभ गर्न पनि धेरै सजिलो थियो ।

आरएक्स१०० मा ९८ सीसीको टु स्ट्रोक इन्जिनले सुसज्जित थियो । सो इन्जिन निकै शक्तिशाली थियो र यसको एक्सेलरेसनको कारणले पनि सो बाइक निकै लोकप्रिय थियो । सो बाइकले प्रतिलिटर ४५–५० किलोमिटर माइलेज दिन्थ्यो, जसको कारण ८० र ९० को दशकमा आरएक्स१०० बाइक सस्तो विकल्प थियो ।

यामाहा आरएक्स१०० को मर्मत सम्भार पनि कम गर्नु पर्थ्यो । यसको स्पेयर पार्ट्स सजिलै उपलब्ध हुन्थ्यो र सर्भिसिङ लागत पनि कम थियो । सो बाइक स्ट्याटस सिम्बल भए तापनि भारतमा प्रदूषण मापदण्डमा भएको कडाईका कारण बाइकले सो मापदण्ड पूरा गर्न सकेन । त्यसपछि यामाहाले आफ्ना नयाँ मोडलमा ध्यान दिने निर्णय गर्‍यो र आरएक्स१०० को उत्पादन रोकियो ।