थाहा छ, कारको पछाडि विन्डशिल्डमा किन हुन्छ लाइन ?

आजको समयमा कार जीवनको अहम् हिस्सा बनेको छ । कार कम्पनीहरुले पनि ग्राहकहरुको सहजताको लागि कारमा नयाँ नयाँ फिचर समावेश गर्न थालेका छन् । तर, कारमा हुने केही फिचरको बारेमा ग्राहकहरु अनभिज्ञ रहने गरेका छन् ।

ती मध्ये कारको पछाडिको विन्डशिल्डमा हुने लाइन पनि एक हो । तपाईंले कारको पछाडिको विन्डशिल्डमा लाइन बनेको देख्नुभएको होला । ती लाइन छोएर अनुभव गर्न सकिन्छ । उक्त लाइन विन्डशिल्डमा किन बनाइएका होलान् ? कहिले सोच्नु भएको छ ?

खासगरी ती लाइनले डिफ्रोस्टरको रुपमा कार्य गर्छन् । यो लाइन नभई एक प्रकारको सानो र पातलो तार हो । जसलाई सिसाको भित्री भागमा नै निर्माण गरिएको हुन्छ । जसले कारको पछाडि लागेको शित वा बर्फलाई मेटाउने काम गर्छ ।

सो डिफ्रोस्टर तार एक प्रकारको वायर ग्रिड हुन्छ । जसले विद्युतीय तरङ प्रयोग गरी सिसालाई भौतिक रुपमा तातो बनाउनको लागि प्रतिरोधी हिटिङको उपयोग गर्छ । सिसालाई तातो बनाउदा त्यसमा लागेको बर्फ चाँडै पग्लन्छ ।

कारको फ्रन्ट विन्डशिल्डमा भने सो लाइन हुँदैन । कारको सो डिफ्रोस्टिङ सिस्टमलाई प्राथमिक कार डिफ्रोस्टरको रुपमा मानिन्छ । सो प्राथमिक डिफ्रोस्टिङ सिस्टमले ड्यासबोर्ड भेन्टको माध्यमले सिधा विन्डशिल्डमा तातो हावा प्रवाह गर्छ र सिसा भित्रबाट तातो हुन्छ । जसले गर्दा कारको फ्रन्ट विन्डशिल्डमा सो लाइनको आवश्यकता पर्दैन ।