किन हुन्छ कारको ब्रेक फेल ? सडकमै ब्रेक फेल भए के गर्ने ?

कल्पना गर्नुहोस् यदि तपाईं कार चलाउँदै हुनुहुन्छ र तपाईंलाई ब्रेक फेल भएको थाहा भयो भने के हुन्छ ? यस्तो अवस्थामा त्रसित नहुनुहोस् र संयमका साथ यी उपायहरु अपनाउनुहोस् ।

ब्रेक फेल हुनुको कारण के हो ?
कारको ब्रेक फेल हुनुको सबैभन्दा ठूलो कारण कारको नियमित सर्भिस नहुनु हो । लामो समयसम्म ड्राइभ गरेपछि कारको ब्रेक प्याड खिइन थाल्छ । ब्रेक प्याड समयमै परिवर्तन गर्नुपर्छ ।

कारको ब्रेक फ्लुइड चुहावट वा कम ब्रेक फ्लुइडको कारणले पनि ब्रेक लाग्दैन । लामो ड्राइभमा जानु अघि ब्रेक फ्लुइडको स्तर जाँच गर्नुपर्छ । कहिलेकाहीँ ब्रेक फ्लुइड लिक हुन पनि सक्छ र ब्रेक फेल हुन्छ ।

गाडीको तल्लो भागमा ठोक्किएर पनि ब्रेक लाइन बिग्रन्छ । यसको बारेमा तुरुन्तै थाहा नहुन सक्छ र कारको ब्रेकले धोका दिन सक्छ । यदि ब्रेक कम लाग्छ भने तुरुन्त सर्भिस सेन्टरमा गएर जाँच गर्नुपर्छ ।

अचानक ब्रेक फेल भए के गर्ने ?
अचानक ब्रेक फेल भएमा इन्जिन बन्द गर्ने गल्ती कहिले नगर्नुहोस् । कारलाई रिभर्स गियरमा पनि राख्नु हुँदैन । यसो गर्दा गाडी सडकमा चिप्लिन सक्छ । ब्रेक फेल भएको अवस्थामा कारको हाजार्ड लाइट अन गर्नुहोस् र कारको हर्न बजाइ राख्नुहोस् ।

गाडीलाई साइडमा लैजाने प्रयास गर्नुहोस्, जसले गर्दा ट्राफिक समस्याबाट टाढा हुन सक्छ । कारको गति कम गर्ने प्रयास गर्नुहोस् । यदि कार उच्च गियरमा चलिरहेको छ भने यसलाई चौथो वा तेस्रो गियरमा सिफ्ट गर्नुहोस् र क्लच छिट्टै छोड्नुहोस् । यसले झट्का लागे पनि कारको गति कम हुनेछ । गति थोरै घटेको बेला दोस्रो र पहिलो गियरमा पनि उही प्रक्रिया पछ्याउनुहोस् ।

अधिक स्पिडमा ह्यान्डब्रेक अचानक प्रयोग नगर्नुहोस् । यसो गर्नाले अगाडिको चक्का लक हुन्छ र कार सडकमा चिप्लिएर पल्टिन सक्छ । गति घटेको लागेमा र स्किड नभए जस्तो लागेमा बिस्तारै ह्यान्ड ब्रेक तान्नुहोस् ।