६ लाख सेवाग्राही लाइसेन्सको पखाईमा, कहिले पाइएला नयाँ लाइसेन्स

काठमाडौं – हाल चालक अनुमति पत्र अर्थात स्मार्ट लाइसेन्सको पर्खाइमा धेरै छन् । देशभर नयाँ र पुराना गरी करिब ६ लाख सेवाग्राही यसको पर्खाइमा रहेको बताइन्छ । यद्यपि पुस दोस्रो साताबाट प्रतिदिन ६ लाख प्रिन्ट हुने गरी यसको प्रिन्ट थालिएको र सम्बन्धित कार्यालयमा पठाउन थालिएको छ ।

लाइसेन्सको लागि प्रक्रिया पुरा गरेका ७ हजार सेवाग्राही भएको र करिब १ लाख १५ हजार लाइसेन्स प्रिन्ट गरेर सम्बन्धित यातायात कार्यालयमा पठाइसकिएको छ । विभिन्न कठिनाईका कारण भनेकै समयमा स्मार्ट लाइसेन्स प्रदान गर्न नसकिने बाध्यता रहेको यातायात व्यवस्था विभागका महानिर्देशक नमराज घिमिरेको भनाइ छ । उनका अनुसार प्रदेश मन्त्रालय र त्यसअन्तर्गतका कार्यालयमा जनशक्ति र प्रविधिको प्रयोग नबढेसम्म प्रक्रिया पूरा गरे पनि तुरुन्त लाइसेन्स दिन सक्ने अवस्था छैन ।

घिमिरेका अनुसार विदेश जाने र अति जरुरी परेकालाई चाँडो लाइसेन्स प्रिन्ट गरेर दिनुपर्ने कारण त्यसको पनि लोड परेको हुँदा एक सिफ्ट यसका लागि छुट्याइएको छ । हाल यस्ता सेवाग्रहीले एक हप्ता पश्चात तुरुन्तै लाइसेन्स पाउने व्यवस्था छ ।

मेसिनले एक घण्टामा ४ सय ५० वटा कार्ड छाप्न सक्छ । देशभर २१ वटा यातायात व्यवस्था कार्यालय छन् । काठमाडौंमा रहेका ४ वटा यातायात व्यवस्था कार्यालयमा प्रिन्ट भएको लाइसेन्स पठाइसकिएको विभागका सूचना अधिकारी तथा निर्देशक लोकनाथ भुसालले जानकारी दिएका छन् ।

अहिले भने नयाँ सवारी चालक अनुमति प्राप्त गर्ने व्यक्तिका लागि एक वर्षको परीक्षणकालीन कार्ड दिइनेछ, जुन सबै यातायात व्यवस्था कार्यालयबाट ट्रायल पास गर्नासाथ पाइन्छ ।