यी हुन् खरिदका लागि लामो समय पर्खनुपर्ने ५ एसयूभी, १८ महिना सम्मको वेटिङ पिरियड

विश्वभरका अटो उद्योग विगत केही महिनादेखि सेमीकन्डक्टर चिप्सको अभावसँग जुधिरहेका छन् । सेमीकन्डक्टर चिप्सको समस्या तत्काल समाधान नहुने सम्भावना छ । जसका कारण सवारी साधन खरिदका लागि लामो प्रतीक्षा गर्नुपर्ने भएको छ । हाल यो अवधि अझै बढ्ने देखिएको छ ।

उच्च ग्राउन्ड क्लियरेन्स र अफ रोड प्रदर्शनका कारण विगत केही वर्षमा एसयूभीको माग तीव्र रूपमा बढेको छ । त्यस्ता एसयूभी चाहनेहरुले लामो समय देखि नयाँ सवारी साधन किन्न पनि पाएका छैनन् । त्यसको प्रत्यक्ष असर नेपाली ग्राहकलाई समेत परेको छ ।

नेपाली ग्राहकले समेत नेपाली बजारमा यी एसयूभी अपेक्षाकृत रुपमा पाउन सकेका छैनन् । यहाँ हामी लामो समयसम्म प्रतिक्षा गर्नुपर्ने एसयूभीको बारेमा केही चर्चा गरौं ।

महिन्द्रा एक्सयूभी७००
महिन्द्राको एक्सयूभी७०० को ठूलो माग छ । सो एसयूभी खरिदको लागि रङ र भेरिएन्टको आधारमा भारतमै १८ महिनासम्म कुर्नुपर्ने देखिएको छ । एक्सयूभी७००को मूल्य १२ लाख ९५ हजार र फुल लोड भएको भेरिएन्टको मूल्य २३ लाख ७९ हजार भारु रहेको छ । यो २.० एमस्टालिन टर्बो पेट्रोल र २.२ लिटर एमहर्क टर्बो डिजेल इन्जिनमा उपलब्ध छन् । भारतमै लामो समय प्रतीक्षा गर्नुपर्ने भए पछि नेपालमा आउने सम्भावना समेत पर धकेलिएको छ ।

महिन्द्रा थार
महिन्द्राको थार कम्प्याक्ट अफ–रोड एसयूभी सबैभन्दा लामो प्रतीक्षा अवधि भएको दोस्रो एसयूभी हो । सो एसयूभी खरिदका लागि १२ महिनासम्म प्रतिक्षा गर्नुपर्छ । हाल यसको मूल्य १३ लाख १७ हजार देखि १५ लाख ५३ हजार भारु सम्म रहेको छ । नयाँ थारमा १५२ बीएचपी, २.० लिटर टर्बो पेट्रोल वा १३२ बीएचपी, २.२ लिटर टर्बो डिजेल इन्जिनहरू छन् । नेपालमा समेत यो गाडी अझै भित्रिन सकेको छैन ।

हुन्डाई क्रेटा
हुन्डाई क्रेटा सबैभन्दा बढी बिक्री हुने एसयूभी मध्येको एक हो । क्रेटाको वेटिङ पिरियड १० महिना रहेको छ । यो मोडल हाल १० लाख २३ हजार देखि १७ लाख ९४ हजार भारु मूल्यमा उपलब्ध छ । यो ११३ बीएचपी, १.५ लिटर एनए, ११३ बीएचपी, १.५ लिटर टर्बाे पेट्रोल, १३८ बीएचपी, १.४ लिटर टर्बो पेट्रोल इन्जिन विकल्पमा उपलब्ध छ । नेपाली बजारमा पनि ग्राहकले चाहे अनुसारको संख्या र कलरमा यो एसयूभी पाउन सकेका छैनन् ।

टाटा पन्च
टाटा पन्चको प्रतीक्षा अवधि ७ महिनासम्म छ । कम्पनीले अक्टोबर २०२१ देखि हालसम्म टाटा पन्च एसयूभीको ३२ हजार भन्दा बढी युनिट बिक्री गरिसकेको छ । सो मिनी एसयूभीमा १.२ लिटर पेट्रोल इन्जिन उपलब्ध छ जसले ८६ बीएचपीको पावर र ११३ एनएम टर्क उत्पादन गर्छ । नेपालमा पनि यो एसयूभी उपलब्ध गराउने तयारी भए पनि अझै उपलब्ध हुन सकेको छैन ।

किया सेल्टोस/सोनेट
किया सेल्टोस र सोनेट एसयूभी भेरिएन्टको आधारमा ६ महिनासम्मको प्रतीक्षा अवधि छ । सोनेटको मूल्य ६ लाख ९५ हजार देखि १३ लाख ६९ हजार भारु र सेल्टोसको मूल्य ९ लाख ९५ हजार देखि १८ लाख १९ हजार भारु बीच रहेको छ । सेल्टोसमा ११४ बीएचपी, १.५ लिटर पेट्रोल, १४० बीएचपी, १.४ लिटर पेट्रोल र ११५ बीएचपी, १.५ लिटर डिजेल इन्जिन समावेश छ । सोनेटमा ८३ बीएचपी, १.२ लिटर एनए पेट्रोल, १२० बीएचपी, १.० लिटर टर्बो पेट्रोल र १०० बीएचपी, १.५ लिटर टर्बो डिजेल जस्ता ३ इन्जिन विकल्पमा उपलब्ध छ । नेपाली बजारमा अपेक्षाकृत संख्या र कलरमा यी दुवै एसयूभी उपलब्ध हुन सकेको छैन ।