चीनमा फक्सवागन र एसएआईसीले २०४० सम्म सहकार्य गर्ने

फक्सवागन र एसएआईसीले चीनमा गरिरहेको सहकार्य सन् २०४० सम्म विस्तार गर्ने सम्झौता सम्पन्न गरेका छन् । जर्मनीको वल्फ्सवर्गमा अवस्थित कम्पनी फक्सवागनले सो जानकारी सार्वजनिक गरेको छ । यसले चिनियाँ अटो उद्योग र फराकिलो आर्थिक अवस्थालाई प्रतिविम्बित गरेको छ ।

दुवै कम्पनी मिलेर चिनियाँ बजारमा इलेक्ट्रिफिकेसन र इन्टेलिजेन्ट भेइकल टेक्नोलोजी विस्तार गर्ने कार्यमा प्रतिबद्धता जनाएका छन् ।

एसएआईसी र फक्सवागनले सन् १९८४ अक्टोबरमा सहकार्यको सुरुवात गरेका थिए र एसएआईसी फक्सवागन नामक पहिलो प्यासेन्जर कार ज्वाइन्ट भेन्चरको स्थापना गरेका थिए । त्यसपछि नै विभिन्न समयमा सो सहकार्यलाई नवीकरण गरिरहेका छन् ।

फक्सवागनको चाइनिज बजारका लागि एक प्रतिनिधिले सबै लेभलमा ‘इन चाइना, फर चाइना’ रणनीति अन्तर्गत कार्य गरिरहेको बताए । यस अनुसार सन् २०२६ मा नयाँ जेनेरेसनको इलेक्ट्रिफाइड भेइकल ल्याउने र आर्थिक तथा प्राविधिक रुपमा भविष्य केन्द्रित गाडी बजारमा ल्याउने उनले बताए ।

एसएआईसी फक्सवागनले सन् २०३० सम्म १८ नयाँ मोडल बजारमा ल्याउने र ती मध्ये १५ मोडल चाइनिज बजारलाई लक्ष्यित गर्ने तयारी छ । यस अनुसार आगामी दिनमा अल–इलेक्ट्रिक, रेन्ज–एक्सटेन्डेड भेरिएन्ट र प्लग–इन हाइब्रिड जस्ता प्रोडक्ट लाइनअप विस्तार गरिने छ ।