थप स्पोर्टी वनेर आयो फक्सवागन टिगुवानको एक्सक्लुसिभ एडिसन

फक्सवागनले आफ्नो चर्चित एसयूभी टिगुवानको एक्सक्लुसिभ एडिसन लन्च गरेको छ । इन्टेरियर र एक्सटेरियरमा सामान्य कस्मेटिक अपडेट गरिएको यो एसयूभीको मूल्य ३३ लाख ५० हजार भारु निर्धारण गरिएको छ । यसको पावरट्रेन र मूख्य फिचर भने रेगुलर मोडल सरहनै रहेको छ ।

यो नयाँ एडिसनमा १८ इन्चको ट्विन फाइभ स्पोक एलोई ह्विल दिइएको छ । जसले नयाँ एसयूभीको लुक्सलाई थप स्पोर्टी देखाउन मद्धत गरेको छ । साथै ह्विलमा डाइनामिक हवक्याप र पछाडी लोड सिल प्रोटेक्सन थप गरिएको छ । यसको वि पिल्लरमा स्पेसल एडिसन लेखिएको व्याज समेत टाँसिएको छ । क्याविनमा खासै अपडेट नगरिएपनि यसमा एल्मुनियम फुट प्याडल भने थप गरिएको छ ।

रेगुलर टिगुवानकै पावरट्रेन दिइएको यो नयाँ एडिसनमा फक्सवागनले २.० लिटर, फोर सिलिन्डर, टर्वोचार्ज्ड पेट्रोल इन्जिन उपलब्ध गराएको छ । जसको पावर १९० एचपी र टर्क ३२० एनएम रहेको छ । यसमा ७ स्पिड डुअल क्लच अटोमेटिक ट्रान्समिसन र अल ह्विल ड्राइभ सिस्टम दिइएको छ ।

यसमा एलइडी म्याट्रिक्स हेडलाइट, गेस्चर कन्ट्रोल सहितको ८ इन्चको टचस्क्रिन इन्फोटेन्मेन्ट, लेदर सिट, एम्विएन्ट लाइटिङ, थ्रि जोन क्लाइमेट कन्ट्रोल सिस्टम र पानारोमिक सनरुफ लगायत फिचर्स समेल गरिएको छ । सेफ्टि फिचर अन्तर्गत ६ ओटा एयरव्याग, एविएस, इएससी, हिल स्टार्ट एसिस्ट र हिल डिसेन्ट कन्ट्रोल दिइएको छ ।