मिनी एसयूभी भीएफ–३ लाई भारतमा उत्पादन गर्दै भीनफास्ट, नेपाल पनि आउने

भियतनामी ईभी निर्माता भीनफास्टले भारतमा भीएफ–३ इलेक्ट्रिक मिनी–एसयुभीको डिजाइन पेटेन्ट दायर गरेको छ । भारतमा प्लान्ट निर्माणको काम अघि बढाइसकेको कम्पनीले निकट भविष्यमै यसको उत्पादन सुरु गर्ने देखिएको छ ।

अमेरिकाको लस भेगासमा हालै सम्पन्न कन्ज्युमर इलेक्ट्रोनिक्स शोमा डेब्यू गरिएको भीएफ–३ दुई ढोका भएको मिनी एसयूभी हो । जसमा बक्सी डिजाइन रहेको छ । यसमा अगाडि र पछाडि चंकी बम्परहरू दिइएको छ भने ह्वील आर्चमा ब्ल्याक फिनिश दिइएको छ । कारमा ब्ल्याक रुफ र ग्लोस ब्ल्याक अलोय ह्वील पाउन सकिन्छ ।

कारको इन्टेरियरमा एन्ड्रोइड अटो र एप्पल कारप्ले कनेक्टिभिटीको साथ १० इन्चको टचस्क्रिन इन्फोटेनमेन्ट प्रणाली, डिजिटल इन्स्ट्रुमेन्ट क्लस्टर र २–स्पोक स्टेयरिङ ह्वील दिइएको छ । ईभीमा स्वचालित क्लाइमेट कन्ट्रोल, क्रुज कन्ट्रोल र दोस्रो पङ्क्तिमा फोल्डिङ सिटहरू पनि छन् ।

सींगल मोटर द्वारा संचालित सो नयाँ एसयुभीमा दिइएको ब्याट्री प्याकको प्राविधिक स्पेसिफिकेशन भने खुलाएको छैन । कारले २०१ किलोमिटर रेन्ज दिने दावी गरिएको छ ।

भीनफास्टको भारत यात्रा तय भएसंगै नेपालमा समेत बिक्री गर्नेगरी बिशाल ग्रुपले डिलरसिप लिइसकेको छ । भारतीय बजारमा सन् २०२५ देखी भिनफास्टका ईभी उपलब्ध हुने र लगत्तै नेपाली बजारमा पनि आउने अनुमान गर्न सकिन्छ ।