टेस्लाले बेलायतमा ‘सेल्फ ड्राइभिङ’ कार बेच्न नपाउने, यस्तो छ कारण

टेस्लाले बेलायतमा ‘सेल्फ ड्राइभिङ’ कार बिक्री गर्न नपाउने भएको छ । बेलायतको नयाँ कानुन अन्तर्गत टेस्लाले यो प्रतिबन्धको सामना गर्नुपरेको हो ।

यससँगै इलन मस्कको ‘रोबट ड्रिभन’ गाडी बिक्री गर्ने योजनामा धक्का लागेको छ । यसअघि नै बेलायतमा टेस्लाविरुद्ध ‘ड्राइभर एसिस्टेन्स’ प्रविधिलाई लिएर मुद्दा चलिरहेको थियो । टेस्लामा सेल्फ ड्राइभिङको फिचर भए पनि कार निरन्तर ड्राइभरको निगरानीमा चल्छ । त्यसलाई ‘एसिस्टेन्स सिस्टम’ भनिन्छ ।

टेस्लाले ‘फुल सेल्फ ड्राइभिङ’ अपग्रेडका लागि विश्वभरबाट ग्राहकलाई हजारौं पाउण्ड डलर तिर्न लगाइरहेको छ । यद्यपि, उसले सो प्रविधिको ‘टेस्ट भर्सन’ भने उत्तर अमेरिकी देशमा मात्रै ‘एक्टिभेट’ गरेको छ ।

गत सातामात्रै बेलायतको सरकारले ‘सेल्फ ड्राइभ’, ‘ सेल्फ ड्राइभिङ’, ‘ड्राइभ इटसेल्फ’, ‘ड्राइभरलेस’ र ‘अटोमेटेड भेहिकल’ लाई नियमन गर्न विधेयक ल्याउने घोषणा गरेको थियो ।

अटोमेटेड भेहिकल विधेयक कानुनमा परिणत भएसँगै प्रतिबन्ध कार्यान्वयनमा आउनेछ । यो कानुन सन् २०२४ वा २०२५ देखि लागू हुनेछ । बेलायतको यो कानुनले टेस्लालाई सोही प्रविधिको आधारमा बजारमा गाडी बिक्री गर्न गाह्रो हुनेछ ।