मोटरसाइकल चोरी गर्ने नयाँबजार र बालाजुबाट २ जना पक्राउ

काठमाडौं– मोटरसाइकल चोरी गर्ने २ जना नयाँबजार र बालाजुबाट पक्राउ परेका छन् ।

महानगरीय ट्राफिक प्रहरी महाशाखाको पिडित सहायता इकाइबाट सादा पोषाकमा खटिएका ट्राफिक प्रहरीको टोलीले नयाँबजारबाट आयुष थापामगर र बालाजुबाट रोशन लामिछाने चढिरहेको मोटरसाइकलसहित आइतबार पक्राउ गरेको हो ।

नयाँबजार सडकखण्डबाट धादिङ त्रिपुरासुन्दरी गाउँपालिका वडा नम्बर ५ चैनपुरका २२ वर्षीय आयुष थापामगरलाई प्रदेश ३–०२–००८प २६०७ नम्बरको कालो रातो रङको २२० सी.सी. को पल्सर मोटरसाइकललाई पक्राउ गरिएको महाशाखाले जनाएको छ । अनुसन्धानको क्रममा उक्त मोटरसाइकलको वास्तविक नम्बर लु ५२ प ७३३५ खुल्न आएको छ ।

उक्त नम्बरको मोटरसाइकल २०७६ भदौ ६ गते ठमलस्थित भगवानबहाल मन्दिर अगाडि पार्किङस्थलबाट हराएको हुँदा खोज तलास गरी पाउँ भनी कुमार राना मगरले महाशाखामा निवेदन दिएका थिए । उक्त निवेदनको आधारमा मोेटरसाइकल र मानिस पक्राउ गरी आवश्यक कारवाहीका लागि महानगरीय प्रहरी वृत्त लैनचौर पठाइएको छ ।

यस्तै, दोलखाका २४ वर्षीय रोशन लामिछानेलाई बागमती प्रदेश ०२–०१७ प ३४४७ नम्बरको कालो रातो रङको २२० सीसीको पल्सर मोटरसाइकल सहित पक्राउ गरिएको हो । उक्त नम्बरको मोटरसाइकल गत मंसिर १४ गते काठमाडौं बनस्थलीबाट हराएको भन्दै रामकृष्ण ढकालले महाशाखामा निवेदन दिएका थिए । उक्त निवेदनका आधारमा मोटरसाइकल र मानिस पक्राउ गरी आवश्यक कारवाहीको लागि महानगरीय प्रहरी वृत्त, बालाजु पठाइएको महाशाखाले जनाएको छ ।

महाशाखाले पौष महिनामा मात्रै ४१ वटा मोटरसाइकल अनुसन्धानका लागि ल्याएको र ११ जनालाई पक्राउ गरी मुद्धा समेत चलाइसकिएको महाशाखाका प्रमुख एसएसपी जनक भट्टराईले जानकारी दिए ।