आयो इको र पावर मोडमा चलाउन मिल्ने टीभीएस राइडर १२५, पल्सर र साइनसँग प्रतिस्पर्धा हुने

टीभीएसले भारतीय बजारमा १२५ सीसीको स्पोर्टी कम्युटर बाइक राइडर १२५ लन्च गरेको छ । ७७ हजार ५ सय भारु मूल्य राखिएको यो बाइकको टीएफटी स्क्रिन–इक्विप्ड भेरिएन्टको मूल्य भने ८५ हजार ५ सय भारु राखिएको छ । यसका साथ टीभीएसले अब १२५ सीसी सेगमेन्टमा नयाँ बाइकका साथ प्रवेश गरेको छ ।

स्पोर्टी स्टाइल मन पराउने ग्राहकलाई मध्यनजर गरी टीभीएसले यसमा फंकी हेडलाइट, मस्कुलर ट्यांकी, सार्प बेली प्यान र स्प्लिट सिट सेटअप राखेको छ । यसमा भएको एलईडी टेललाइट पनि युनिक छ ।

टीभीएस राइडरमा १२४.८ सीसीको थ्री भल्व, एयरकुल्ड इन्जिन छ, जसले ११.४ एचपी पावर र ११.२ एनएम टर्क जेनेरेट गर्छ । उक्त फ्युल इन्जेक्टेड इन्जिनलाई फाइभ स्पिड गियरबक्सका साथ पेयर गरिएको छ । टीभीएसले यो बाइकले ६७ किलोमिटर प्रतिलिटरको माइलेज दिने दाबी गरेको छ ।

यो बाइकमा टेलिस्कोपिक फोर्क र मोनोसक सस्पेन्सन छ । अघिल्लो भागमा २४० एमएम डिस्क ब्रेक र पछिल्लो भागमा १३० एमएम ड्रम ब्रेक छ । बाइकमा १७ इन्चको अलोय ह्विल छ । यसमा १ हजार ३२६ एमएमको ह्विलबेस र ७८० एमएमको सिट हाइट छ । यसमा १० लिटरको इन्धन ट्यांकी छ भने कर्ब वेट १२३ किलोग्राम छ ।

१८० एमएम ग्राउन्ड क्लियरेन्स भएको यो बाइकले ५.९ सेकेन्डमै ० देखि ६० किलोमिटर प्रतिघण्टा सम्मको गति लिन सक्छ ।

दायाँ हाततिर उपलब्ध हुने स्विच गियरबाट यसलाई इको र पावर मोडमा चलाउन सकिन्छ । त्यसैगरी पिलियन सिटमुनी स्टोरेज स्पेस समेत रहेको छ ।

बाइकमा भएको फुल्ली डिजिटल इन्स्ट्रयुमेन्ट क्लस्टर एक महत्वपूर्ण फिचर हो । यो सेगमेन्टको मोटरसाइकलमा हुनु पर्ने सबै आधारभूत फिचर यसमा छन् । गियर पोजिसन इन्डिकेटर समेत रहेको यो बाइकमा अप्सनल टीएफटी स्क्रिन फिचरिङ ब्लुटुथ कनेक्टिभिटी समेत केही समय पश्चात उपलब्ध हुने कम्पनीले बताएको छ ।

टीभीएसले यो भन्दा पहिले बजारमा उपलब्ध गराएका भिक्टर जीएलएक्स १२५, फ्लेम र फोनिक्स पछि अब केही राम्रो बजार ल्याउने आशा गरिएको बाइक हो ।

बजारमा होन्डा सीबी साइन, साइन एसपी १२५, हिरो ग्ल्यामर, बजाज पल्सर १२५ र एनएस १२५ आदि बाइकसँग राइडर १२५ को प्रतिस्पर्धा हुनेछ । नेपाली बजारमा पनि यो बाइक केही समय पछि उपलब्ध हुने अनुमान गर्न सकिन्छ ।