टीभीएसले ल्यायो नयाँ इलेक्ट्रिक स्कुटर, यस्तो छ मूल्य र विशेषता

टीभीएसले आफ्नो ईभी लाइनअपमा नयाँ स्कुटर थपेको छ । कम्पनीले अर्विटर नामक नयाँ इन्ट्री–लेभल इलेक्ट्रिक स्कुटर लन्च गरेको हो । हालको आइक्युब भन्दा तलको यस मोडलको मूल्य ९९ हजार ९०० भारु निर्धारण गरिएको छ ।

फ्युचरिष्टिक डिजाइनमा तयार पारिएको सो नयाँ स्कुटरको अगाडिको एप्रोन वरिपरि एलईडी डीआरएल स्ट्रिपका साथ स्लिक एलईडी हेडल्याम्प उपलब्ध गराइएको छ । यसमा छोटो विन्डस्क्रिन तथा ३४ लिटर क्षमताको अन्डर स्टोरेजसहित फ्ल्याट सिट र फ्ल्याट फुटबोर्ड राखिएको छ ।

स्कुटरमा ३.१ किलोवाट आवरको ब्याट्री प्याक जडान गरिएको छ, जसले सिंगल चार्जमा १५८ किलोमिटर रेन्ज दिने दाबी गरिएको छ ।

अगाडि १४ इन्चको ह्विल र पछाडि १२ इन्चको ह्विल जडान गरिएको सो स्कुटर टेलिस्कोपिक फ्रन्ट फोर्क र पछाडि डुअल शक अब्जर्ब सस्पेन्सन सेटअपद्वारा सुसज्जित छ ।

डिजिटल इन्स्ट्रयुमेन्ट कन्सोल राखिएको अर्बिटरमा टर्न–बाई–टर्न नेभिगेसन र ओभर–द–एयर अपडेट जस्ता सुविधाहरू छन् । यसले एन्टी–थेफ्ट, क्र्यास र जियो–फेन्सिङ अलर्टहरू पनि प्रदान गर्दछ । साथै, क्रुज कन्ट्रोल, हिल–होल्ड असिस्ट, पार्किङ असिस्ट र इको तथा पावर सहित दुई राइडिङ मोडहरू पाउन सकिन्छ ।