टीभीएस आईक्युब इलेक्ट्रिक स्कुटरको नयाँ बेस र टप भेरिएन्ट थप

टीभीएसले आफ्नो एक मात्र इलेक्ट्रिक स्कुटर आईक्युबको नयाँ भेरिएन्ट थपेको छ । कम्पनीले करिब २ वर्षपछि सो स्कुटरको नयाँ बेस भेरिएन्ट र टप भेरिएन्ट थपेको हो । आईक्युबको सबैभन्दा सस्तो भेरिएन्टमा २.२ किलोवाट र टप भेरिएन्टमा ५.१ किलोवाट ब्याट्री उपलब्ध हुनेछ । अब आईक्युब, आईक्युब एस र आईक्युब एसटी गरी ३ भेरिएन्टमा आईक्युब उपलब्ध हुने भएको छ ।

आईक्युबको २.२ किलोवाट ब्याट्री भएको सस्तो भेरिएन्ट स्कुटरले एक पटक चार्जमा ७५ किलोमिटरको रेन्ज दिन्छ । सो स्कुटर २ घण्टामा ० देखि ८० प्रतिशतसम्म चार्ज हुने कम्पनीको दाबी छ । यसका लागि कम्पनीले ९५० वाटको चार्जर उपलब्ध गराएको छ । सो ई–स्कुटरको टप स्पिड ७५ किलोमिटर प्रतिघण्टा छ । यसमा ३० लिटर स्टोरेज र वजन ११५ किलो छ ।

सो इलेक्ट्रिक स्कुटरको १२.३ किलोवाट ब्याट्री भएको दोस्रो भेरिएन्टमा थेफ्ट अलर्ट र टर्न बाई टर्न नेभिगेसन उपलब्ध छ । स्कुटरमा ५ इन्चको टीएफटी डिस्प्ले पनि उपलब्ध गराएको छ । यस स्कुटरमा मल्टि राइड मोड, कल अलर्ट, म्यासेज अलर्ट, रिभर्स पार्किङ जस्ता फिचर पनि उपलब्ध छ । कम्पनीले यसमा ९५० वाटको चार्जर पनि उपलब्ध गराएको छ । सो ई–स्कुटरको टप स्पिड ७५ किलोमिटर प्रतिघण्टा छ । यसमा ३० लिटर स्टोरेज उपलब्ध छ ।

आईक्युब एसटी लाइनअपमा कम्पनीले ३.४ किलोवाट र ५.१ किलोवाट क्षमताको ब्याट्री प्याक दिएको छ । २ वर्ष अघि ५.१ किलोवाट भेरिएन्ट सार्वजनिक गरिएको थियो । हाल सो स्कुटर लन्च गरिएको छ । ३.४ किलोवाटको रेन्ज १०० किलोमिटर छ । यसमा ७ इन्चको टचस्क्रिन टीएफटी डिस्प्ले समावेश छ । यसलाई ० देखि ८० प्रतिशत चार्ज हुन २ घण्टा ५० मिनेट लाग्छ ।

आईक्युब एसटीमा भएको ५.१ किलोवाट ब्याट्रीले सिंगल चार्जमा १५० किलोमिटरको रेन्ज प्रदान गर्छ । यसको टप स्पिड ८२ किलोमिटर प्रति घण्टा छ । सो स्कुटर ० देखि ८० प्रतिशत चार्ज हुन ४ घण्टा १८ मिनेट लाग्छ । एसटी ५.१ र एसटी ३.४ मा समान फिचर उपलब्ध छ ।