टीभीएस अपाचेको रफ्तार : २ वर्षमै २० लाख युनिट बिक्री, विश्वभर ७० लाख ग्राहक

काठमाडौं–टीभीएसको लोकप्रिय सिरिज अपाचेले विश्वव्यापी बजारमा एक नयाँ र ऐतिहासिक माइलस्टोन पार गरेको छ । युवा पुस्तामा निकै लोकप्रिय मानिने यस मोटरसाइकलले विश्वभर कुल ७० लाख युनिट बिक्री गरेर नयाँ कीर्तिमान कायम गरेको हो ।

कम्पनीले आफ्नो ७० लाखौँ उत्पादनको रूपमा विशेष कालो रङको अपाचे आरआर३१० सुपरस्पोर्ट बाइकलाई एक भव्य समारोहका बीच ग्राहकलाई हस्तान्तरण गर्दै यस उत्सवलाई विशेष बनाएको छ ।

अपाचे सिरिजलाई शून्यबाट ७० लाखको यो उचाइसम्म पुग्न कुल २० वर्षको लामो यात्रा तय गर्नु परेको थियो । तर, चाखलाग्दो कुरा के छ भने, पछिल्लो समय यसको लोकप्रियता यसरी चुलियो कि मात्र २ वर्षको छोटो अवधिमा २० लाख युनिट अपाचे बाइकहरू बिक्री भए ।

कम्पनीले सन् २०२३ मा ५० लाख बिक्रीको उत्सव मनाएको थियो भने सन् २०२५ मा ६० लाखको आँकडा पार गर्दै सन् २०२६ मा ७० लाखको ऐतिहासिक रेकर्ड राख्न सफल भएको हो ।

टीभीएसका अनुसार, बाइकको पर्फर्मेन्स र राइडिङ कल्चर मन पराउने चालकहरूको आफ्नै एउटा ठुलो सञ्जाल बनेको छ । हाल ‘अपाचे ओनर ग्रुप’मा मात्रै ५ लाखभन्दा बढी सक्रिय सदस्यहरू आबद्ध छन् । समग्र रूपमा हेर्दा, विश्वभर ६ करोड ५० लाखभन्दा बढी ग्राहकले टीभीएसका मोटरसाइकल तथा स्कुटर गुडाइरहेका छन् ।

अपाचेको यो सफलतामा यसका विभिन्न सेगमेन्टका बाइकहरूको ठुलो हात छ । बजारमा सुरुवाती रेन्जका आरटीआर१६०, आरटीआर१६० ४भी, आरटीआर १८०, र आरटीआर २०० ४भी ले आफ्नो बलियो पकड बनाएका छन् । त्यसैगरी, प्रिमियम सेगमेन्ट तर्फ आरआर ३१० सुपरस्पोर्ट, आरआर३१० र एड्भेन्चर प्रेमीहरूका लागि आरटीएक्स सिरिजले ग्राहकको मन जितिरहेका छन् ।

अपाचे सिरिज नेपाली राइडरमाझ समेत निकै लोकप्रिय बनेको मोटरसाइकल हो । नेपालमा हाल यसको आरटीआर१६०, आरटीआर१६० ४भी, आरटीआर १८० र आरटीआर २०० ४भी र आरआर ३१० मोडल उपलब्ध छन् । यी बाइक नेपालस्थित टीभीएसको एसेम्वल प्लान्टबाटै उत्पादन गरिन्छ ।