टिभिएस र बिएमडब्लुले एउटै प्लेटफर्ममा इलेक्ट्रिक टु ह्विलर उत्पादन गर्ने

टिभिएस र बिएमडब्लुले एउटै प्लेटफर्ममा इलेक्ट्रिक टु ह्विलर उत्पादन गर्ने भएका छन् । यी दुई कम्पनीले अहिले पनि भारतमा एउटै प्लेटफर्ममा ३१० सिसी क्षमताका मोटरसाइकल उत्पादन गरिरहेका छन् । बिएमडब्लुको जि ३१० आर र जी ३१० जिएस तथा टिभिएस अपाचे आरआर ३१० एकै प्लेटफर्ममा उत्पादन गरिएका मोटरसाइकल हुन् । बिएमडब्लुले यी बाइकलाई टिभिएसको प्लान्टबाट उत्पादन गरी विश्व बजारमा निर्यात गर्दै आइरहेको छ ।

भारत सहित विश्व बजारमै इलेक्ट्रिक टु ह्विलरको माहोल उत्साहप्रद बनिरहेको सन्दर्भमा यी दुई ब्रान्डले इलेक्ट्रिक सेग्मेन्टमा समेत सहकार्य गर्ने बताएका हुन् । जसअन्तर्गत टिभिएसले बिएमडब्लूका लागी इलेक्ट्रिक टु ह्विलरको डिजाइन र प्रोडक्ट डेभ्लप्मेन्टमा सहयोग गर्ने जनाइएको छ । साथै उसले गुणस्तर र सप्लाई चेन म्यानेजमेन्टमा समेत सहयोग गर्नेछ ।

नयाँ उत्पादनलाई अबको २ बर्षभित्रै बजारमा ल्याइसक्ने गरी यी दुई कम्पनीले अहिले संयुक्त रुपमा नयाँ आर्किटेक्चर र प्रबिधीका क्षेत्रमा काम गरिरहेका छन् । पहिलो चरणमा इलेक्ट्रिक स्कुटरलाई बजारमा उतार्ने उनीहरुको योजना छ ।

टिभिएसले हाल आई क्यूब मोडलको इलेक्ट्रिक स्कुटरलाई भारतीय बजारमा बिक्री गर्दै आइरहेको छ । हालै उसले स्विजरल्यान्डको सबैभन्दा ठूलो इलेक्ट्रिक बाइक उत्पादक स्विस ई–मोबिलिटी ग्रुपको ७५ प्रतिशत सेयर खरिद गरिसकेको छ भने केही बर्ष पहिले अर्को स्विस इलेक्ट्रिक बाइक उत्पादक इजिओ मुभमेन्टको ८० प्रतिशत सेयर समेत खरिद गरेको थियो ।