फक्सवागन र स्कोडा गाडीमा प्रयोग हुने टीएसआई इन्जिन के हो, के छ यसको फाइदा ?

नेपाली बजारमा कारोबार हुने दुई युरोपियन ब्रान्ड फक्सवागन र स्कोडा कारमा प्रयोग भैरहेको टीएसआर्ई अर्थात टर्बो स्ट्राटिफाइड इन्जेक्सन (Turbo Stratified Injection) इन्जिन पछिल्लो समय चर्चामा छ । नेपाली बजारमा सार्वजनिक हुने अन्तिम तयारीमा रहेको स्कोडा कुशाकलाई आधिकारिक बितरक एमएडब्ल्यु इन्टरप्राइजेजले यही इन्जिनसँग जोडेर प्रचारप्रसार गरिरहेको छ । त्यसैगरी फक्सवागनको बहुप्रतीक्षित एसयूभी टाइगुनमा समेत यही इन्जिन जडान गरिएका कारण नेपालस्थित बिक्रेता कम्पनी पूजा इन्टरनेसनल नेपालले समेत यही इन्जिनलाई जोडेर गाडीका बारेमा थप जानकारी प्रदान गरिरहेको छ ।

त्यसो त स्कोडा र फक्सवागनमा यो इन्जिन जडान भएको पहिलोपटक भने होइन । युरोपियन बजारबाट नेपाल भित्रिएका यस अघिका थुप्रै मोडलमा यो इन्जिन प्रयोग भैसकेको छ । यद्यपि भारतीय प्लान्टमा निर्मित यी दुई ब्रान्डमा कम्पनीले पहिलोपटक यस्तो इन्जिन प्रयोग गर्न थालेको हो । जसको सुरुवात स्कोडामा कुशाक र फक्सवागनमा टाइगुनमार्फत गरिएको छ । फक्सवागनले विस्तारै पोलो लगायत गाडीमा समेत यसको प्रयोग गर्ने तयारी अघि बढाएको छ ।

युरोपमा निर्मित अधिकांश सवारीसाधनमा यो इन्जिन धेरै पहिलेदेखि नै प्रयोग हुँदै आएपनि भारतीय बजारमा भर्खरै सुरुवात भएका कारण नेपालमा यसको चर्चा बढ्न थालेको हो । त्यसो त भारतमा उत्पादन हुने अन्य ब्रान्डमा धेरै पहिलेदेखि नै टर्बोचार्ज्ड इन्जिन जडान हुँदै आइरहेको छ । टीएसआर्ई पनि टर्बोचार्ज्डकै विकसित डिजाइन भए पनि यसको प्रयोग विशेषगरी फक्सवागन र स्कोडा लगायत यससँग एलायन्स गरी सवारीसाधन उत्पादन गर्ने विभिन्न ब्रान्डमा प्रयोग हुँदै आइरहेको छ ।

फक्सवागन गाडीको नेपालस्थित आधिकारिक बितरक पूजा इन्टरनेसनल नेपालका प्रोडक्ट सपोर्ट म्यानेजर विकास गुरुङका अनुसार प्रदूषण कम गर्न लागू गरिएको युरो ६ जस्ता मापदण्डका कारण सवारी साधन उत्पादक कम्पनीहरुले कम प्रदूषण गर्ने साना इन्जिनको विकास गर्दै जानेक्रममा यस प्रकारको इन्जिन विकसित भएको हो । परम्परागत सवारीसाधनमा प्रयोग हुने ठूलो आकारको इन्जिनलाई जतिसक्दो सानो अर्थात कम्प्याक्ट गर्दै जादा टर्बो इन्जिन अघि आएको उनको भनाइ छ ।

आकारमा सानो भैकन पनि यस्ता इन्जिनले दिने पावर र टर्क तथा पर्फमेन्स भने उच्चतम हुने उनी बताउँछन् । उनी भन्छन, ‘इन्जिनलाई सानो बनाउँदै जाने क्रममा यसको पावर तथा पर्फमेन्समा कमी आउन नदिनका लागि विकास गरिएको नयाँ र अत्याधुनिक प्रविधिमा आधारित इन्जिन हो टीएसआर्ई । यस्ता इन्जिनको सीसी क्षमता कम भएपनि पावर तथा पर्फमेन्स भने उच्च रहन्छ । १ हजार ६ सय सीसी क्षमताका अन्य गाडीले दिने पावर तथा पर्फमेन्स टीएसआर्ई इन्जिन जडान गरिएका १ हजार सीसी क्षमताका गाडीले सहजै उपलब्ध गराउँछ ।’

पछिल्लो समय टीएसआर्ई भन्दा पनि थप पावरफुल विशेषताको जीटी अर्थात ग्रान्ड टुर टीएसआर्ई इन्जिन जडान भएका कारहरु बजारमा आइरहेका छन् । फक्सवागनका पोलो, पासाट र गल्फ लगायत मोडलमा यस प्रकारका इन्जिन जडान भई नेपाल भित्रिएको गुरुङले बताए ।
नर्मल इन्जिन जडान भएको १ हजार सीसी क्षमताको गाडीले ५६ किलोवाट पावर दिने तर सोही क्षमताको टीएसआर्ई इन्जिनले ७७ किलोवाट र जीटी टीएसआर्ई इन्जिन जडान भएको गाडीले ८१ किलोवाटसम्म पावर जेनेरेट गर्ने उनी बताउँछन् ।