ट्रायम्फ नेपालको एपिक राइडको भिडियो सार्वजनिक गर्दै सम्पन्न भयो ‘म्युजिक नाइट’

काठमाडौं – ट्रायम्फ नेपालले नक्सालस्थित बाइकर्स क्याफेमा ‘म्युजिक नाइट’ कार्यक्रम सम्पन्न गरेको छ । बाइक र संगीतप्रेमीहरूलाई एउटै मञ्चमा ल्याउने उत्साहजनक कार्यक्रम ‘म्युजिक नाइट’ आयोजना गरिएको कम्पनीको भनाइ छ । सो साँझमा १५० भन्दा बढी ट्रायम्फ राइडर, मोटरसाइकलप्रेमी तथा संगीतप्रेमीहरू सहभागी थिए।

कार्यक्रमको मुख्य आकर्षण भनेको ‘एपिक राइडः एकोस अफ द लस्ट किङडम’ को अफिसियल भिडियो प्रिमियर थियो। यो भिडियोले ट्रायम्फ नेपालको एपिक राइड यात्रालाई समेटेको छ, जहाँ ३८ जना ट्रायम्फ राइडरहरूले ८ दिनमा काठमाडौँदेखि अपर मुस्ताङको ऐतिहासिक ठाउँ लोमान्थाङसम्म करिब १ हजार किलोमिटर यात्रा गरेका थिए। मन्दिर, अग्ला भञ्ज्याङहरू हुँदै मनमोहक दृश्यहरूका साथ गरिएको यात्राका क्रममा खिचिएको भिडियोले साहस, मित्रता र सहकार्य मिश्रित ट्रायम्फ राइडिङ जीवनशैलीलाई गहिरो रूपमा प्रस्तुत गरेको छ ।

कार्यक्रममा चर्चित ब्याण्ड ‘प्रश्नचिन्ह’ को दर्शक झुमाउने लाइभ प्रस्तुतिका साथै रमाइला खेलहरू, ओपन माइक सेसनहरू पनि भएका थिए जसले ट्रायम्फ राइडरहरूबीच आपसी भेटघाट तथा मनोरञ्जनको राम्रो वातावरण सिर्जना गरेको थियो ।

कार्यक्रमको बारेमा बोल्दै,ट्रायम्फ नेपालका प्रबन्धक सागर थापाले भने, ‘म्युजिक नाइट केवल रमाइलोका लागि मात्र नभएर, ट्रायम्फ राइडरहरूबीचको एकता र आत्मीयताको प्रतीक पनि हो । जब कुनैपनि उद्देश्य प्राप्तिका लागि साहस गरिन्छ तब के प्राप्त गर्न सकिन्छ भन्ने एउटा उदाहरण हो ‘एपिक राइड’, र यस्तै साहसी राइड अयोजना गर्न पाउँदा हामी गौरवान्वित छौं ।’

यस्तै अविस्मरणिय अनुभवमार्फत नेपालमा साहसिक र समावेशी राइडर कम्युनिटी बनाउने कम्पनीको उद्देश्यका निम्ति यो ‘म्युजिक नाइट’ पनि एउटा कोशेढुङ्गा बनेको ट्रायम्फ नेपालले जनाएको छ ।