ट्रान्स हिमालय एड्भेन्चरको तयारी पुरा, भोलि मुस्ताङ प्रस्थान गर्दै बाइकरहरु

काठमाडौं – काठमाडौं देखि मुस्ताङ सम्म बाइकरहरुको सम्मिलित हुने मोटरसाइकल टुरिङ (यालीको सम्पूर्ण तयारी पूरा भएको छ ।

नेपाल अटोमोबाइल्स एसोसिएसनको मोटरसाइकल र टुरिङ कमिसनको संयुक्त आयोजनामा हुने कार्यक्रम भोलि देखि शुरु हुनेछ भने आगामी शुक्रबार सम्म चल्ने छ ।

नेपाललाई विश्वकै मोटर स्पोर्ट्सको गन्तव्य बनाउने अभियानमा सहयोग पुर्याउने उद्देश्यले आयोजना हुने कार्यक्रममा काठमाडौं देखि पोखरा, जोमसोम, पोखरासम्म मोटरसाइकल टुरिङ -याली हुनेछ ।

कार्यक्रमको दौरान बन्दीपुर, पोखरा, घान्द्रुक, वाग्लुङ, तातोपानी, रुप्से झरना, लेते, कागबेनी, मार्फा, धुम्बाताल, जोमसोम, मुक्तिनाथ, लुम्ले र कुस्माको फोटोग्राफी, भिडियोग्राफी सहित सेफ्टी राइडिङ सम्वन्धी जनचेतनामूलक कार्यक्रम समेत हुनेछ ।

माउन्टेन स्पोर्ट्स फेस्टिभल अन्तर्गत दिगो पर्यटनको लागि टु ह्विल टुरिङलाई प्रवर्धन गर्ने उद्देश्यका साथ साहसिक खेलकुदको रुपमा समेत यसलाई लिइएको छ । सेफ्टी राइडिङको सन्देश समेत फैलाउन सहयोग पुग्ने गरी सो राइड अन्तर्गत अन्य विभिन्न कार्यक्रम समेत आयोजना गरिने छ ।

जोमसोममा मोटोखाना रेसिङ, सेल्फी च्यालेञ्ज तथा सेफ राइडिङ र ट्यालेन्ट हन्ट सम्बन्धी विभिन्न क्रियाकलाप हुने आयोजना नासा नेपालले जनाएको छ । राष्ट्रिय खेलकद परिषद् र अन्तर्राष्ट्रिय मोटरसाइकल फेडरेसन (FIM) को सहयोग तथा गण्डकी अटोमोबाइल्स एसोसिएसनको प्राविधिक सहयोगमा हुने कार्यक्रम पोखरामा हुने मोटो इन्डुरो च्याम्पियनसिपमा आएर समापन हुनेछ ।

कार्यक्रम संयोजक अनिलकुमार बरालले ट्रान्स हिमालय एडभेन्चरले नेपाली खेलकुद तथा पर्यटनमा छुट्टै पहिचान बनाउने बताए । राष्ट्रिय खेलकुद परिषद्ले नेपालको साहसिक तथा पर्वतीय खेलकुदमा लिएको चासो दिगो खेल पर्यटनको आधार बन्ने विश्वास देखिएको बरालले बताए ।