मर्सिडिज बेन्जलाई पछि पार्दै टोयोटा बन्यो विश्वकै मूल्यवान कार ब्रान्ड

विश्वको सबैभन्दा मूल्यवान अटोमोबाइल कम्पनी टोयोटा बनेको छ । यो भन्दा पहिले मर्सिडिज बेन्ज पहिलो नम्बरमा रहेकोमा हाल टोयोटा पहिलो नम्बरमा उक्लिएको हो ।

अटोमोटिभ इन्डष्ट्री २०२१ को रिपोर्ट अनुसार टोयोटाको ब्रान्ड भ्याल्यु २०२० मा ५८ हजार ७६ मिलियन डलर रहेकोमा हाल ५९ हजार ४७९ मिलियन डलर पुगेको छ ।

त्यसैगरी दोस्रो नम्बरमा रहेको मर्सिडिज बेन्जको ब्रान्ड भ्याल्यु ६५ हजार ४१ मिलियन डलरबाट ५८ हजार २२५ मिलियन डलरमा ओर्लिएको छ ।

तेस्रो नम्बरमा फक्सवागन रहेको छ, जसको ब्रान्ड भ्याल्यु ४७ हजार २० मिलियन डलर छ । चौथो नम्बरमा रहेको बीएमडब्ल्युको ४० हजार ४४७ मिलियन र पाँचौ नम्बरमा रहेको पोस्र्चेको ब्रान्ड भ्याल्यु ३४ हजार ३२६ मिलियन डलर छ ।

छैटौं देखि दशौं नम्बर सम्म धेरै ब्रान्ड भ्याल्यु भएका कम्पनीहरु क्रमशः टेस्ला, होन्डा, फोर्ड, भल्वो र औडी रहेका छन् ।