यारिस, कोरोल्ला र इकोमा निःशुल्क एयरब्याग परिवर्तन हुँदै : सर्भिस सेन्टरमा सम्पर्क गर्न आग्रह

काठमाडौं – तपाईसँग सन् २००६ देखि २०१० सम्म बनेका टोयोटाका यारिस, कोरोल्ला र इको गाडी छन् भने निःशुल्क रुपमा एयरब्याग परिवर्तन गर्न सकिन्छ । नेपालका लागि टोयोटाको आधिकारिक वितरक युनाइटेड ट्रेडर्स सिन्डिकेटले आफ्नो सर्भिस सेन्टरमार्फत यो सुविधा उपलब्ध गराइरहेको छ ।

टोयोटा सर्भिस नेपालले आफ्नो फेसबुक पेजमार्फत यसको जानकारी प्रदान गरेको छ । विश्वभर पहिले देखि नै टोयोटाका विभिन्न मोडलका गाडीहरुमा एयरब्याग परिवर्तन गर्ने कार्य भइरहेको छ । टोयोटाका गाडीमा एयरब्याग निर्माता कम्पनी टाकाटाका एयरब्याग प्रयोग गरिएका छन् । तर सन् २००६ देखि २०१० सम्म उत्पादन भएका यी तीन मोडलका गाडीमा भएको एयरब्यागमा खराबी पाइएको छ ।

धेरै तापक्रम भएको अवस्थामा आद्र्रताका कारण यसले राम्रोसँग काम गर्न नसकेको पाइएको छ । कुनै अवस्थामा दुर्घटना भइहालेमा एयरब्याग फुक्नुको सट्टा यो विष्फोट हुने सम्भावना देखिएको छ । यही कुरालाई मनन गरी टोयोटा र टाकाटाले विश्वभर एयरब्याग परिवर्तन अभियान नै चलाएका छन् ।

नेपालमा पनि यो अवधिमा बनेका यी तीन मोडलका ८ सय भन्दा बढी गाडी उपलब्ध भएको कम्पनी स्रोतको भनाइ छ । नेपालमा सन् २०१८ देखि नै एयरब्याग परिवर्तन अभियान जारी छ । हाल सम्म नेपालमा उपलब्ध गाडी मध्ये ७० प्रतिशत भन्दा बढी गाडीमा निःशुल्क रुपमा एयरब्याग परिवर्तन भइसकेको समेत कम्पनी स्रोतले बताएको छ ।

कुनै गाडीमा देखिने खराबीलाई समाधान गर्नका लागि विश्वभर विभिन्न अटोमोबाइल निर्माता कम्पनीहरुले रिकल अभियान नै चलाउने गरेको पाइन्छ । टोयोटाको यो अभियान पनि त्यसैको एउटा उदाहरण हो ।