भारतमा टोयोटाका ३ लाख बढी हाइब्रिड कार

भारतमा टोयोटाका हाइब्रिड कार निकै लोकप्रिय मानिन्छन् । भारतमा हाइब्रिड कारको मार्केट साइज त्यत्ति ठूलो नभएपनि टोयोटाका उत्पादनले भने यस सेग्मेन्टमा उत्साहप्रद बजार पाइरहेको छ ।

टोयोटाले हालै भारतमा ३ लाख हाइब्रिड कारको माइलस्टोन हासिल गरेको छ, जसले देशमा सेल्फ–चार्जिङ हाइब्रिड इलेक्ट्रिक गाडीहको बढ्दो स्वीकृतिलाई प्रतिबिम्बित गर्दछ ।

हाइब्रिड प्रविधिको कुरा गर्दा टोयोटा विश्व बजारमै अग्रपंक्तिमा रहेको छ । कम्पनीले विश्वव्यापी रूपमा ३ करोड ८० लाखभन्दा बढी यस्ता गाडी बेचेको छ, जसले १९ करोड ७० लाख टनभन्दा बढी कार्बन डाइअक्साइड प्रदूषण बचत गरेको अनुमान गरिएको छ ।

टोयोटाका हाइब्रिड पावरट्रेनमा पेट्रोल इन्जिन र इलेक्ट्रिक मोटर समावेश गरिएको हुन्छ । सो पावरट्रेनमार्फत दुबै पावर स्रोतहरू बीच स्विच र संयोजन गर्दछ, जसले गर्दा सवारी साधनहरू धेरैजसो समय इलेक्ट्रिक मोडमा सञ्चालन हुन सक्षम हुन्छन् । यसले इन्धन दक्षतामा उल्लेखनीय सुधार गर्छ ।

भारतमा, टोयोटाले अर्बन क्रुजर हाइराइडर, इनोभा हाइक्रस, क्यामरी र भेल्फायरमा हाइब्रिड पावरट्रेनहरू उपलब्ध गराउँदै आएको छ ।