३६ लाख ८० हजार भारु सम्ममा लन्च भयो टोयोटा हाइलक्स

जापनिज अटो निर्माता टोयोटाले भारतमा उत्पादन गरेको हाइलक्सलाई आज औपचारिक लन्च गरेको छ । केही महिनाअघि सार्बजनिक गरिएको यसको बुकिङ गत जनवरी महिनादेखी नै खुल्ला गरिएको थियो । स्टान्डर्ड र हाई गरी कुल २ ट्रिममा उपलब्ध यसको मूल्य क्रमश ३४ लाख र ३६ लाख ८० हजार भारुसम्म कायम गरिएको छ ।

यो कम्पनीको आईएमवी–२ प्लेटफर्ममा निर्माण गरिएको पिकअप हो । जुन प्लेटफर्ममा टोयोटाले यसअघि इन्नोभा क्राइस्टा र फर्चूनर एसयुभीलाई निर्माण गरिसकेको छ । ५ जनाले यात्रा गर्न मिल्ने यो डबल क्याव पिकअपलाई डिजेल इन्जिनमा मात्र उपलब्ध गराइएको छ ।

टोयोटाले हाइलक्सको ह्विलबेस बढाएर ३०८५ एमएम बनाएको छ । यसको लम्बाई ५३२५ एमएम, चौडाइ १८५५ एमएम र उचाइ १८६५ एमएम छ । हाइलक्सको ग्राउण्ड क्लियरेन्स २१६ एमएम छ र यसको तौल २.१ टन छ ।

यसमा टोयोटा फर्चुनरमा प्रयोग गरिएको २.८ लिटर, फोर सिलिन्डर टर्बो चार्ज्ड डिजेल इन्जिन जडान गरिएको छ, जसले २०४ एचपी पावर र ४२० एनएम टर्क जेनेरेट गर्छ ।

हाइलक्समा सफ्ट टच मेटरियल, ८ इन्चको टचस्क्रिन इन्फोटेनमेन्ट सिस्टम, एप्पल कारप्ले र एन्ड्रोइड अटो सपोर्ट, पुश स्टार्टरस्टप बटन, जेबीएल सिस्टम, ड्युअल जोन अटो एसी र लेदरको अपहोल्स्ट्री उपलब्ध छ । यसमा फ्रन्ट पार्किङ सेन्सर, क्रुज कन्ट्रोल, अतिरिक्त एयरब्याग, एलएसडी र पावर एडजस्टेबल ड्राइभर सिट समावेश गरिएको छ ।

नेपाली बजारमा समेत निकै नै रुचाइएको यो प्रिमियम पिकअपलाई कम्पनीले अहिले थाइल्यान्डबाट आयत गरी ल्याइरहेको छ । भारतमा उत्पादन भई सार्वजनिक समेत भैसकेका कारण अव उप्रान्त यो भारतबाटै आउन सक्ने देखिएको छ । हाल यसको मूल्य नेपाली बजारमा १ करोड १० लाख रुपैयाँसम्म निर्धारण गरिएकोमा भारतबाट आउँदा यो मूल्य झनै महंगिएर आउनसक्ने आँकलन गरिएको छ ।