लन्च भयो टोयोटाको सबैभन्दा सस्तो कार ग्लान्जा, यस्तो छ भेरिएन्ट अनुसार विशेषता

टोयोटाले नयाँ जेनेरेसन ग्लान्जा लन्च गरेको छ । नयाँ टोयोटा ग्लान्जा प्रिमियम ह्याचब्याक कारको मूल्य ६ लाख ३९ हजार देखि ९ लाख ६९ हजार भारुसम्म तोकिएको छ । सो कार नयाँ मारुती सुजुकी बलेनोमा आधारित छ । सो कार ४ भेरिएन्ट ई, एस, जी र भीमा लन्च गरिएको छ, जसले हुन्डाई आई२० र होन्डा ज्याज जस्ता कारसँग प्रतिस्पर्धा गर्नेछ ।

यो ह्याचब्याक कार किन्न चाहने ग्राहकले ११ हजार भारु तिरेर बुक गर्न सक्नेछन् । नयाँ ग्लान्जा सबैभन्दा सस्तो कारको रुपमा भारतमा लन्च गरिएको छ । टोयोटा ग्लान्जा मारुती सुजुकी बलेनोको रिब्याज गरिएको भर्सन हो । प्रिमियम ह्याचब्याक कैयौं फिचर र नयाँ लुक र स्टाइलमा उपलब्ध छ ।

टोयोटा ग्लान्जा ई
टोयोटा ग्लान्जा ई प्रिमियम ह्याचब्याकको बेस भेरिएन्ट हो, जसको मूल्य ६ लाख ३९ हजार भारु छ । ग्लान्जा ई म्यानुअल गियरबक्समा मात्र उपलब्ध छ । कारको फ्रन्ट बम्परमा कार्बन फाइबर टेक्सचर्ड इलिमेन्ट, बडी कलरका बम्पर, फुल ह्विल क्याप्ससहितको १५ इन्चको स्टिल ह्विल, हेलोजन ल्याम्प, एलईडी टेललाइट, ब्ल्याक ओआरभीएम र डोर ह्यान्डल जस्ता फिचर रहेको छ ।

यसमा ड्युअल टोन थिम, इन्स्ट्रयुमेन्ट क्लस्टरमा मोनोक्रोम टीएफटी डिस्प्ले, म्यानुअल ओआरभीएम, रिभर्स पार्किङ सेन्सर, गियरसिफ्ट इन्डिकेटर, रियर डिफोगर जस्ता फिचर छन् । सेफ्टी फिचरमा ड्युअल फ्रन्ट एयरब्याग, ईबीडीको साथमा एबीएस, स्पिड सेन्सिङ, डोर लक, इन्जिन इमोबिलाइजर, फोर्स लिमिटरसहितको फ्रन्ट सिटबेल्ट प्रि–टेन्सनर्स, आइसोफिक्स एन्कोरेज र चाइल्ड–प्रुफ रियर डोर लकहरु समावेश छन् ।

टोयोटा ग्लान्जा एस
टोयोटा ग्लान्जा एस बेस मोडेल भन्दा माथि राखिएको छ र यसको मूल्य म्यानुअल भेरिएन्टको लागि ७ लाख २९ हजार र एएमटी भेरिएन्टको लागि ७ लाख ७९ हजार भारु तोकिएको छ । ग्लान्जा एसमा ई भेरिएन्टमा पाइने सबै फिचरहरू समावेश छन् ।

टोयोटा ग्लान्जा जी
टोयोटा ग्लान्जा जी म्यानुअल र एएमटी गियरबक्समा उपलब्ध छ । यसको एमटीको भेरिएन्टको मूल्य ८ लाख २४ हजार र एएमटी भेरिएन्टको मूल्य ८ लाख ४७ हजार भारु तोकिएको छ । सो भेरियन्टमा एलईडी प्रोजेक्टर ल्याम्प, ओआरभीएम इन्टिग्रेटेड एलईडी टर्न इन्डिकेटर्स, रियर वाइपर, बडी कलर्ड ओआरभीएम, क्रोम डोर ह्यान्डल, फ्लोटिङ रुफ डिजाइनको साथमा कालो रङको पिलर्स उपलब्ध छ ।

यसको क्याबिनको इन्स्ट्रयुमेन्ट क्लस्टरमा ४.२ इन्च कलर टीएफटी डिस्प्ले, १७.७८ सेमी टचस्क्रिन इन्फोटेनमेन्ट सिस्टम, २ ट्वीटर, टोयोटा आई–कनेक्ट, इलेक्ट्रिक एडजस्टेबल ओआरभीएम, पुश स्टार्ट बटन, रिभर्स पार्किङ क्यामेरा, स्टेयरिङ माउन्टेड कन्ट्रोल बटन, एसी, रियर एसी भेन्ट्स, रियर फास्ट चार्जिङ युएसबी पोर्ट उपलब्ध छ । सेफ्टी फिचरमा भेहिकल स्टेबिलिटी कन्ट्रोल र एएमटी मोडेलको लागि हिल होल्ड कन्ट्रोल, फ्रन्ट साइड र कर्टेन एयरब्यागहरू समावेश छन् ।

टोयोटा ग्लान्जा भी
टोयोटा ग्लान्जा भी ह्याचब्याकको टप–एन्ड मोडेल हो र म्यानुअल तथा एएमटी गियरबक्स दुबै विकल्पमा उपलब्ध छ । म्यानुअल र एएमटी भेरिएन्टको मूल्य क्रमशः ९ लाख १९ हजार र ९ लाख ६९ हजार भारु छ । यसमा १६ इन्चको अलोय ह्विल, एलईडी फगल्याम्प, एलईडी डेटाइम रनिङ लाइट, यूभी प्रोटेक्टेड ग्लास फिचर समावेश छन् । यसको क्याबिनमा २२.८६ सेमी टचस्क्रिन इन्फोटेनमेन्ट सिस्टम, एम प्रिमियम अर्कामिस साउन्ड सिस्टम, हेड्स–अप डिस्प्ले, ३६० डिग्री क्यामेरा, क्रुज कन्ट्रोल जस्ता फिचर उपलब्ध छन् ।

भविष्यमा यो कार नेपाली बजारमा पनि उपलब्ध हुने अनुमान गर्न सकिन्छ ।