भारतमा पहिलो पटक मोटोजीपी रेस आयोजना हुने, यसरी गर्न सकिन्छ टिकट बुकिङ

भारतमा सेप्टेम्बर २२ देखि सेप्टेम्बर २४, २०२३ सम्म मोटोजीपी रेस हुने भएको छ । ग्रेटर नोएडाको बुद्ध इन्टरनेसनल सर्किटमा आयोजना हुने सो मोटोजीपीका लागि लागि टिकट बिक्री भइरहेको छ ।

मोटोजीपी इन्डिया २०२३ को आधिकारिक आयोजक फेयरस्ट्रिट स्पोर्ट्सले मोटोजीपी रेसको टिकट बिक्री सुरु गरेको हो । मोटोजीपीको टिकट बुकमाईशो वेबसाइटमा गएर बुक गर्न सकिन्छ । सुरुमै दर्ता भएका प्रयोगकर्ताका लागि टिकट शुक्रबारदेखि बिक्री सुरु भएको हो र सामान्य टिकट भने जुन २४ गते दिउँसो १२ बजेदेखि बिक्री सुरु भएको हो ।

फेयरस्ट्रिट स्पोर्ट्सले कुल ११ तहमा टिकट बिक्री गरेको छ । सामान्य टिकटको मूल्य ८ सय भारुदेखि सुरु हुन्छ, मुख्य ग्रान्डस्ट्यान्ड टिकटको मूल्य २० हजार देखि ३० हजार भारु र प्लेटिनम कर्पाेरेट बक्स सिटको मूल्य ४० हजार भारु तोकिएको छ ।

पहिलो मोटोजीपी इन्डिया ग्राण्ड प्रिक्स ग्रेटर नोएडा, उत्तर प्रदेशको बुद्ध अन्तर्राष्ट्रिय सर्किटमा आयोजना हुनेछ । उक्त रेस ट्रयाक लगभग ५ किलोमिटर लामो छ र कुल १६ कुना समावेश छ । यसमा लगभग १ लाख मानिसको सिट क्षमता रहेको छ ।