रोयल इन्फिल्डले ३ नयाँ बाइक ल्याउने

रोयल इन्फिल्डले ३ वटा नयाँ बाइक ल्याउने तयारी गरिरहेको छ । यसबारे कम्पनीले अहिलेसम्म कुनै आधिकारिक जानकारी नदिएको भए पनि रिपोर्टका अनुसार ३ वटै बाइकलाई फरक–फरक सेगमेन्टमा ल्याउन सकिने अनुमान गरिएको छ । कम्पनीले सो बाइक यस वर्षको अन्त्यसम्ममा लन्च गर्नेछ ।

नयाँ बुलेट ३५०
मिडिया रिपोर्टका अनुसार नयाँ पुस्ताको बुलेट ३५० ल्याउने तयारी भइरहेको छ । यसमा ३४९ सीसीको नयाँ आयलकुल्ड ओएचसी इन्जिन दिइने अनुमान गरिएको छ । सो बाइकमा जे सिरिज इन्जिन भएको क्लासिक ३५० जस्तै धेरै समानता हुनेछ । सो इन्जिनले २०.२ बीएचपी र २७ एनएमको टर्क जेनेरेट गर्छ । यसको मूल्य लगभग हन्टर ३५० को मूल्य बराबर हुनेछ ।

न्यू हिमालयन ४५०
टुर बाइक प्रेमीका लागि कम्पनीले नयाँ हिमालयन ४५० ल्याउने छ । मिडिया रिपोर्टका अनुसार यो बाइक लन्च हुनुअघि परीक्षणका क्रममा सडकमा धेरै पटक देखिएको छ । बाइकमा ४५० सीसी सिंगल सिलिन्डर लिक्विडकुल्ड इन्जिन दिइएको छ, जसले ४० बीएचपी पावर जेनेरेट गर्छ ।

शटगन ६५०
रोयल इन्फिल्डले ६५० सीसी सेग्मेन्टमा नयाँ बाइक शटगन ६५० ल्याउने भएको छ । सो बाइक भारतमा परीक्षणको क्रममा पनि देखिएको छ । रिपोर्टका अनुसार यसमा ६४८ सीसीको समानान्तर ट्विन सिलिन्डर इन्जिन दिइनेछ ।