प्रतिस्थापन विधेयक असर : होन्डाले बढायो तीन मोटरसाइकलको मूल्य

काठमाडौं – सरकारले केही दिन पहिले ल्याएको प्रतिस्थापन विधेयक पश्चात होन्डाका तीन मोटरसाइकलको मूल्यमा वृद्धि भएको छ । नेपालका लागि होन्डाको आधिकारिक वितरक स्याकार ट्रेडिङ कम्पनीले तीन मोडलका मोटरसाइकलको मूल्यमा वृद्धि गरेको छ ।

हालै नेपाल भित्रिएका दुई मोडल सीबी हाइनेस ३५० र सीबी ३५० आरएस तथा अर्को १५० सीसीको मोटरसाइकल युनिकर्नको मूल्यमा वृद्धि गरिएको छ । सीबी हाइनेस ३५० मा २५ हजार र सीबी ३५० आरएसको मूल्यमा २३ हजार रुपैयाँले वृद्धि गरिएको छ भने युनिकर्नमा समेत २० हजार रुपैयाँ वृद्धि भएको छ ।

यसअघि ७ लाख ५० हजार ९ सय रुपैयाँ मूल्यमा बिक्री भइरहेको सीबी हाइनेस ३५० को मूल्य ७ लाख ७५ हजार ९ सय पुगेको छ । त्यसैगरी सीबी ३५० आरएसको मूल्य ७ लाख ७५ हजार ९ सय रुपैयाँ भएकोमा अब ७ लाख ९८ हजार ९ सय रुपैयाँ पुगेको छ ।

यी दुबै मोटरसाइकलमा यसअघि ६० प्रतिशत अन्तःशुल्क लाग्दै आएकोमा प्रतिस्थापन विधेयकले ८० प्रतिशत अन्तःशुल्क लगाएको छ ।

अघि ४० प्रतिशत अन्तःशुल्क लाग्दै आएको १५० सीसीका मोटरसाइकलमा अहिले ५० प्रतिशत अन्तःशुल्क लगाइएको छ । यही कारण यसअघि २ लाख ६९ हजार ९ सय रुपैयाँमा बिक्री भइरहेको युनिकर्नको मूल्य अब २ लाख ८९ हजार ९ सय रुपैयाँ पुगेको छ ।