कोलकाताबाट लण्डन जाने क्रममा नेपाल आइपुगे ‘द रोडिसी’ का यात्रु, नेपालमा गरियो स्वागत

काठमाडौं – कुनै बेला कोलकाताबाट लण्डन सम्म जाने बस यात्राको सम्झनामा ९ जना भारतीय यात्रु यात्राका क्रममा नेपाल आइपुगेका छन् । समय समयमा कार यात्रा गरिरहने कौशिक रोयको नेतृत्वमा आएको सो यात्रामा चार एसयूभी प्रयोग भएका छन् । उनीहरु लण्डन सम्मको यात्राका लागि नेपाल आइपुगेका हुन् ।

रक्सौल हुुँदै काठमाडौ आइपुगेका यात्रुलाई आज एक कार्यक्रमका बिच नेपाल अटोमोबाइल्स एसोसिएसनका अध्यक्ष दशरथ रिसाल र एफआईए वर्ल्ड काउन्सिल मेम्बर गोविन्द भट्टराईले स्वागत गरे । उनीहरु नेपालको पशुपतिनाथ र अन्य पर्यटकीय क्षेत्रको भ्रमण गरी चीन प्रस्थान गर्नेछन् ।

महिन्द्रा एक्सयूभी ७००, टोयोटा फर्चुनर, महिन्द्रा थार र बीएमडब्लु एक्स१ एसयूभीमा सवार यी यात्रुहरु अब चीन, किर्गिस्तान, उज्वेकिस्तान, तुर्कमेनिस्तान, इरान, आर्मेनिया, जर्जिया, टर्की, ग्रिस, बुल्गेरिया, सर्बिया, हंगेरी, चेक, पोल्यान्ड, स्लोभाकिया, जर्मनी, स्विट्जरल्यान्ड, लिचटेन्स्टाइन, अष्ट्रिया र फ्रान्स हुँदै युके पुग्ने छन् । सो यात्रा करिव दुई महिनामा सम्पन्न हुनेछ ।

सिएट टायरले प्रायोजन गरेको सो यात्रालाई क्रस ट्रेल भनिएको छ । द रोडिसीले यो भन्दा पहिले पनि यस प्रकारको ट्रेल यात्रा आयोजना गरिसकेको छ ।

फेडरेसन अफ अटोमोबाइल एसोसिएसन (एफआईएए) र कार्ने डी प्यासेज (सीडीपी) को सहायताले सो रोड ट्रिप कोलकाता, काठमाडौं, केरुङ हुँदै लण्डन सम्म पुग्ने छ ।

स्मरण रहोस्, संसारमा इन्टरनेसनल ड्राइभिङ परमिट (आईडीपी) तथा सीडीपीको सहयोगले कुनै पनि कार संसारभर गुडाउनका लागि स्वतः अनुमति प्राप्त हुन्छ ।