२० लाख भन्दा कम मूल्यमै जिनपेङको स्मार्ट सिटी कार, नाडा अटो शोमा सोकेस गरिने

काठमाडौं–नाडा अटो शो २०२५ मा जिनपेङको सानो र स्मार्ट कार प्रदर्शनी हुने भएको छ । जिनपेङको नेपालका लागि आधिकारिक वितरक ठाकुर मोटर्स नेपाल प्रालिले लिङवक्स ईसी०१ मोडलको मिनी विद्युतीय कार सोकेस गर्न लागेको हो । सो नयाँ कारको मूल्य २० लाखभन्दा कम पर्ने जनाइएको छ ।

सिटी र प्रिमियम गरी दुई भेरिएन्टमा नेपाल आएको यस कारमा क्रमशः १९.२६ किलोवाट आवर र ३१.४५ किलोवाट आवरको ब्याट्री प्याक जडान गरिएको छ । एकपटकको फुल चार्ज गरेपछि यसले २४० र ३४० किलोमिटरसम्म रेन्ज दिने दाबी गरिएको छ । कारले डिसी फास्ट चार्जर समेत सपोर्ट गर्दछ । कारको मूल्य १९ लाख ९९ हजार र २४ लाख ९९ हजार रुपैयाँ निर्धारण गरिएको छ ।

प्रिमियम फिचर र आरामदायी विशेषता भएको यस कारमा ४ जनाले यात्रा गर्न सकिन्छ । कारको ग्राउन्ड क्लिरियन्स २०० एमएम छ । लिङवक्समा १०.१ इन्च लामो कनेक्टिभिटी सुबिधा भएको आकर्षक टचस्क्रिन राखिएको छ । सुरक्षाका लागि यसमा एड्भान्स ब्रेकिङ सिस्टम र इन्टेलिजेन्ट कोलिजन डिटेक्सन जस्ता फिचर उपलब्ध छ ।

यस कारको लम्बाई ३५८४ एमएम, चौडाई १४७५ एमएम र उचाई १६१५ एमएम तथा ह्विलवेश २४५५ एमएम छ । प्रतिघन्टा १०५ किलोमिटरसम्मको उच्च गतिमा हाँक्न सकिने लिङवक्समा ३५ किलोवाट क्षमताको मोटर जडान गरिएको छ, जसले १०५ एनएम टर्क जनेरेट गर्दछ ।

जिनपेङ चीनको एक प्रतिष्ठित र पुरानो अटो निर्माता हो । यो कम्पनीले इलेक्ट्रिक कार सहित इलेक्ट्रिक रिक्सा, ट्राईसाइकल र मोटरसाइकल समेत उत्पादन गरी विश्व बजारमा निर्यात गर्दै आएको छ । यस कम्पनीबाट उत्पादन हुने सवारीसाधनको विभिन्न चरणमा परिक्षण हुने जनाइएको छ ।

हरेक उत्पादनको पर्फमेन्स, वाटर प्रुफ र ट्रायल ड्राइभिङ टेष्टपछि मात्रै बजारमा पठाइने कम्पनीको भनाई छ । जिनपेङको चीनमा मात्रै १४ वटा उत्पादन वेस छ भने विश्वभर १ करोड १५ लाख प्रयोगकर्ता छन् । कम्पनी सन् २००४ मा स्थापना भएको हो ।