टेस्लाले ल्याउँदै मोडल वाईको सस्तो भर्सन

टेस्लाले आफ्नो लोकप्रिय एसयूभी मोडल वाईको नयाँ र किफायती संस्करण पेश गर्ने तयारी गरिरहेको छ। सो कदम कम्पनीको घट्दो बिक्री र बढ्दो बजार प्रतिस्पर्धाको बीचमा आएको हो । नयाँ मोडल वाईको डिजाइन र उत्पादन आफ्नै पुरानो प्लेटफर्ममै आधारित हुने भए पनि यसको मूल्य पहिलेको तुलनामा उल्लेखनीय रूपमा कम हुने बताइएको छ ।

टेस्लाका संस्थापक र सीईओ एलोन मस्कले लामो समयदेखि जनताका लागि सस्तो इलेक्ट्रिक कार ल्याउने वाचा गर्दै आएका थिए । यद्यपि, उनले गत वर्ष २५ हजार अमेरिकी डलरमा नयाँ इलेक्ट्रिक कार बनाउने योजना रद्द गरेका थिए। अब आउने सो मोडल वाईलाई त्यस योजनातर्फको पहिलो ठोस कदमका रूपमा हेरिएको छ।

टेस्लाले हालै आफ्नो सामाजिक सञ्जाल प्लेटफर्म ‘एक्स’ मा दुई छोटा भिडियोहरू सार्वजनिक गरेको छ, जसमा कारको हेडलाइट र पाङ्ग्राहरू देखिएको छ ।

रिपोर्टका अनुसार नयाँ टेस्ला मोडल वाईको मूल्य ३० हजार अमेरिकी डलरभन्दा कम हुन सक्ने अनुमान गरिएको छ । कम्पनीले यसअघि नै सो मोडललाई कर क्रेडिट सहित किफायती दायरामा राख्ने संकेत दिइसकेको थियो। गत महिना अमेरिकामा ईभी कर क्रेडिटको अवधि सकिएपछि मूल्य अस्थायी रूपमा बढेको थियो, तर अब सस्तो मोडलको आगमनसँगै बजारमा फेरि माग बढ्ने अपेक्षा गरिएको छ।

साथै टेस्लाले मोडल ३ को सस्तो संस्करण पनि ल्याउने तयारी गरिरहेको छ। कम्पनीले आफ्नो आगामी सवारी साधनलाई प्रविधिक रूपमा उन्नत मात्र नभई जनसाधारणका लागि सहज र किफायती बनाउने रणनीति अपनाएको छ। यदि नयाँ मोडल वाई साँच्चै अपेक्षित मूल्यमा बजारमा आउँछ भने, यो टेस्लाका लागि गेम चेन्जर साबित हुनसक्ने बताइन्छ।