टेस्ला आयतमा कर छुट दिने कदमबाट पछि हट्यो भारत

भारत सरकारले विद्युतीय सवारी साधनको आयातमा कर छुट दिने कुनै प्रस्तावमा विचार नगरेको स्पष्ट पारेको छ ।

वाणिज्य तथा उद्योग राज्यमन्त्री सोम प्रकाशले भने, ‘अहिले भारतमा विद्युतीय सवारीको आयातमा स्थानीय मूल्य अभिवृद्धि लागतमा छुट दिने वा आयात शुल्कमा अनुदान दिने प्रस्ताव आएको छैन । टेस्ला जस्ता ब्राण्डलाई ब्याट्री, सेमीकन्डक्टर र चुम्बकीय पार्टपुर्जाको लागतमा स्थानीय मूल्य अभिवृद्धिबाट छुट दिने र विद्युतीय सवारी साधनको आयातमा अनुदान दिने विषयमा सोधिएको प्रश्नको जवाफ दिँदै उनले यस्तो बताएका हुन् ।

मन्त्रीका अनुसार अटोमोबाइल र अटो कम्पोनेन्ट उद्योगका लागि उत्पादन–सम्बद्ध प्रोत्साहन योजना ईभी र तिनका कम्पोनेन्टहरू सहित उन्नत अटोमोटिभ टेक्नोलोजीहरूको आन्तरिक उत्पादनलाई बढावा दिन आर्थिक प्रोत्साहन प्रदान गर्ने उद्देश्य राखिएको छ ।

सरकारले ‘मेक इन इन्डिया’ पहल अन्तर्गत स्थानीय मूल्य अभिवृद्धि गर्न भारतमा स्वदेशी र विदेशी लगानी बढाउने कदम चालेको पनि बताइएको छ । १८ हजार १०० करोडको बजेट साथ उन्नत रसायन सेल ब्याट्री भण्डारणको लागि पीएलआई योजनाहरू स्वीकृत गरिएको छ ।

अमेरिकास्थित ईभी निर्माता कम्पनी टेस्लाले आयात शुल्क घटाउन माग गर्दै सरकारसँग छलफल गरिरहेको छ । वाणिज्य तथा उद्योग मन्त्री पियुष गोयलले गत महिना क्यालिफोर्नियाको फ्रेमोन्टमा रहेको टेस्ला कारखानाको भ्रमण गरेका थिए, जहाँ उनले कम्पनीले भारतबाट आफ्नो अटो कम्पोनेन्ट आयात दोब्बर बनाउने बताएका थिए ।