महिलाको रोजाइमा प-यो टाटा टियागो ईभी : पर्खाईमा नेपाली ग्राहक

टाटा टियागो ईभी भारतीय बजारमा रुचाइएको इलेक्ट्रिक कार हो । गत जनवरी देखि डेलिभरी शुरु भएको सो ईभी हाल सम्म १५ हजार युनिट भन्दा बढी डेलिभरी भइसकेको छ ।

टाटा टियागो ईभी महिलाहरुले निकै नै रुचाएको पाइएको छ । भारतमा सो ईभी खरिद गर्ने ग्राहक मध्ये ५६ प्रतिशत ग्राहक ४० वर्ष भन्दा कम उमेरका छन् । ती मध्ये पनि २५ प्रतिशत महिला रहेका छन् ।

पुरै इलेक्ट्रिक गाडी खरिद गर्ने महिला ग्राहकको संख्या १२ प्रतिशत मात्र छन् । यो अवस्थामा टियागो ईभीका ग्राहक मध्ये २५ प्रतिशत महिला ग्राहक हुनुले सो कारप्रति महिला ग्राहकको आकर्षण देखाएको छ ।

पछिल्लो चार महिनामा मात्र १० हजार युनिट डेलिभरी भएको टाटा टियागो ईभी नेपालमा पनि प्रतीक्षारत इलेक्ट्रिक कार हो ।

टियागो ईभीमा ४५ किलोवाट मोटर छ । हालै सार्वजनिक गरिएको बजेटले ५० किलोवाट भन्दा कम क्षमता मोटर भएका ईभीको करमा कुनै परिवर्तन नगरेका कारण पनि यसको वारेमा धेरैको चासो छ । फेरि पछिल्लो समयमा बीवाईडी र सिट्रोन लगायतका यस्तै क्षमताका इलेक्ट्रिक कार नेपाली बजारमा उपलब्ध हुने घोषणा गरिएका कारण पनि टियागो ईभीप्रतिको चासो बढेको छ ।

नेपालमा टाटा मोटर्सको आधिकारिक वितरक सिप्रदी ट्रेडिङले यो ईभी नेपाली बजारमा उपलब्ध गराउने बताइसकेको छ । यद्यपि ठ्याक्कै मिति भने तोकिएको छैन ।

यस्तो छ टियागो ईभी

टाटा टियागो ईभीमा सामान्य र फास्ट चार्जिङको विकल्प दिइएको छ । ३.३ किलोवाटको सामान्य चार्जरबाट फुल चार्ज हुन ५ देखि ६.५ घण्टा लाग्छ र ७.२ किलोवाटको एसी फास्ट चार्जरबाट १० प्रतिशत देखि १०० प्रतिशत सम्म चार्ज हुन ३.६ घण्टा लाग्छ । डीसी फास्ट चार्जरबाट ५७ मिनेटमा १० प्रतिशत देखि ८० प्रतिशत सम्म चार्ज गर्न सकिन्छ । यसमा १५ एम्पीयर पोर्टेबल चार्जिङको विकल्प पनि दिइएको छ ।

टाटा टियागो ईभीमा ४५ कनेक्टेड कार फिचरको साथमा जेडकनेक्ट एपको कनेक्टिभिटी उपलब्ध छ । यसको मद्दतले रियल टाइम चार्ज स्टाटस, कारको लोकेशन र एसी अन/अफ गर्न सकिन्छ ।

कारमा हिल स्टार्ट एण्ड डिसेन्ट असिस्ट, आई–टिपीएमएस, अटोमेटिक क्लाइमेट कन्ट्रोल, रेन सेन्सिङ वाइपर, अटोमेटिक हेडल्याम्प, पुस बटन स्टार्ट÷स्टप र क्रुज कन्ट्रोल जस्ता सेफ्टी फिचर उपलब्ध छ ।

टाटा टियागो ईभी लेटेस्ट जिपट्रोन प्लेटफर्ममा तयार गरिएको हो । यसको अगाडि २ वटा एयरब्याग दिइएको छ । आकस्मिक ब्रेकिङका कारण दुर्घटना हुनबाट बच्नका लागि ईबीडीको साथमा एबीएस सिस्टम जडान गरिएको छ । साथै पार्किङको लागि रिभर्स क्यामेरा पनि समावेश गरिएको छ ।