५ हाजरमै टियागो ईभी वुक गर्न सकिने, गाडी हात पार्न ४ महिना सम्म कुनुपर्ने

काठमाडौं– टाटा टियागो ईभीले नाडा अटो शो–२०२३ मा सर्बाधिक चर्चा कमाइरहेको छ । शुरुवाती मुल्य २२ लाख रुपैयाँ निर्धारण भएर बिक्री शुरु भएको यो ह्याचव्याक कार सस्तो मूल्यका कारण चर्चित वनेको हो । टियागोलाई टाटा गाडीको नेपालका लागि आधिकारिक वितरक सिप्रदी ट्रेडिङले ५ हजार लिएर वुकिङ लिँदै आएको छ ।

एकदमै कम रकममा वुकिङ लिएपछि यो कार वुकिङ गर्नेको संख्या वढिरहेको छ । कम्पनी स्रोतका अनुुसार हालसम्म ४ सय हाराहारी ग्राहकले टियागो ईभी वुक गरिसकेको छन् ।

यसरी वुक गर्नेहरुमध्ये अधिकांशले कम्पनीलाई गाडी कहिलेसम्म हात पर्छ भनेर सोध्ने गरेका छन् । साथै उनीहरुले गाडीको टेष्ट ड्राइभ पश्चात चित्त नवुझे वुकिङ रद्ध गर्न मिल्छ कि मिल्दैन भनेर समेत जिज्ञासा राख्दै आएका छन् । उनीहरुले नेक्सन ईभीको प्राइभ भेरिएन्टमा जस्तो यसमा पनि रेन्ज एन्जाईटीको समस्या छ कि छैन भनेर समेत जिज्ञासा राख्ने गरेका छन् ।

ग्राहकको यस्तो जिज्ञासामा कम्पनीले गाडी हात पार्न भेरिएन्ट हेरेर कम्तीमा ४ महिनासम्म कुर्नुपर्ने जवाफ दिँदै आएको छ भने टेष्ट ड्राइभ पश्चात चित्त नवुझे वुकिङ रद्ध गर्न मिल्ने विकल्प दिएको छ । थोरै रकम तिरेर वुकिङ गर्न मिल्ने र चित्त नवुझे रद्ध गर्नसमेत मिल्ने विकल्प पाएपछि आफूले पनि टियागो वुक गरेको एकजना ग्राहकले नेपाल अटोलाई वताए ।

टीयागो ईभीलाई सिप्रदीले ५ भेरिएन्टमा नेपाल ल्याएको हो । जसमध्य सवैभन्दा सस्तो एमआर एक्सई भेरिएन्टको मूल्य २२ लाख तोकिएको छ । यसैगरी एमआर एक्सटीको २३ लाख, एलआर एक्सटीको २५ लाख ४९ हजार, एलआर एक्सजेड प्लसको २७ लाख र एलआर एक्सजेड प्लस टेकलाई २८ लाख पर्छ

टाटाले टियागोको एक्सई र एक्सटी दुई भेरियन्टमा १९.२ किलोवाट आवरको ब्याट्री र ४५ किलोवाटको मोटर दिएको छ । वाँकी तीन भेरियन्ट एक्सटी, एक्सजेड प्लस र एक्सजेड प्लस टेक लग्जरी भेरियन्टमा ४९ किलोवाट क्षमताको मोटर र २४ किलोवाट आवरको ब्याट्री उपलब्ध छ । सानो ब्याट्रीले सिंगल चार्जमा २५० र ठूलो ब्याट्रीले ३१५ किलोमिटर रेन्ज दिने दावी कम्पनीले गरेको छ ।