भविष्यमा सबैभन्दा सस्तो इलेक्ट्रिक कार बन्न सक्छ टाटा पन्च

टाटा मोटर्सले हालै भारतीय बजारका लागि सार्वजनिक गरेको टाटा पन्चको चर्चा चुलिदै छ । आकर्षक डिजाइनमा कम मूल्यमै उपलब्ध हुने अनुमान गरिएको यो कार हेर्दा जति राम्रो छ, पर्फमेन्स पनि उति नै राम्रो हुने बताइएको छ ।

टाटा मोटर्सले भविष्यमा टाटा पन्चको इलेक्ट्रिक भर्सन समेत सार्वजनिक गर्ने अनुमान समेत गर्न थालिएको छ । धेरै आधारहरु भएकैले अनलाइन मिडियाहरुले यो तर्क गरेका हुन् ।

टाटाले यो भन्दा पहिले बजारमा ल्याएको लोकप्रिय कारहरु नेक्सन, टिगोर, अल्ट्रोज आदि सबैको इलेक्ट्रिक भर्सन समेत बजारमा ल्याएको छ । नेक्सन ईभी पहिले देखि नै बजारमा उपलब्ध छ भने टिगोर ईभीको नयाँ भर्सन हालै सार्वजनिक गरिएको छ । अल्ट्रोज पनि इलेक्ट्रिकमा आउने पक्का भइसकेको छ । यो अवस्थामा आगामी दिनमा टाटा पन्च समेत इलेक्ट्रिक भर्सनमा आउने अनुमान गरिएको हो ।

त्यसैगरी टाटा मोटर्सले आगामी सन् २०२५ सम्म १० वटा इलेक्ट्रिक कार लन्च गर्ने घोषणा गरिसकेको छ । इलेक्ट्रिक मोबिलिटीमा आफ्नो उपस्थिति मजबुत बनाउनका लागि टाटाले आफ्ना लोकप्रिय कारलाई इलेक्ट्रिक भर्सनमा ल्याउने लागेको सहजै अनुमान गर्न सकिन्छ । यसैको परिणाम स्वरुप पहिलो चरणमा अल्ट्रोजलाई इलेक्ट्रिक भर्सनमा ल्याउने तयारी थालिएको हो ।

टाटा मोटर्सले हालै सबै इलेक्ट्रिक कारमा जिपट्रोन प्रविधिको प्रयोग गर्न थालेको छ । नेक्सन ईभी, अल्ट्रोज ईभी र टिगोर ईभीमा यही प्रविधि प्रयोग भएको छ । आगामी दिनमा आउने सबै इलेक्ट्रिक कारमा यही प्रविधि प्रयोग हुने अनुमान गर्न सकिन्छ । हालै सार्वजनिक गरिएको नयाँ टिगोर ईभीमा प्रयोग गरिएको यही प्रविधिका कारण यसमा भएको ब्याट्रीले ३०६ किलोमिटर सम्मको रेन्ज दिने बताइएको छ । यसले गर्दा भविष्यमा बजारमा उपलब्ध हुने टाटाका इलेक्ट्रिक कार शक्तिशाली हुनुका साथै बढी रेन्ज दिने समेत हुने अनुमान गरिएको छ ।

टाटाका अपकमिङ सबै कारको रेन्ज ३ सय किलोमिटर भन्दा बढी हुनेछ । त्यसैगरी टाटाले इलेक्ट्रिक कारका लागि आवश्यक पूर्वाधार निर्माणमा समेत ध्यान केन्द्रीत गर्नेछ । भारत मात्र होइन, नेपाली बजारमा समेत टाटा मोटर्सले विभिन्न स्थानमा चार्जिङ स्टेशन निर्माण गर्ने कार्यलाई तीव्रता दिनेछ । यही कुरालाई मनन गरी नेपालमा पनि चार्जिङ स्टेशन निर्माण अभियानमा टाटा मोटर्स समेत लागेको छ ।