लन्च भएको १० महिनामै १ लाख युनिट पन्च उत्पादन, नेपाल आउने मिती अझै अनिश्चित

टाटा मोटर्सको माइक्रो एसयूभी पन्चले लन्च भएको १० महिना अवधिमा १ लाख युनिट उत्पादनको माइलस्टोन पुरा गरेको छ । यससंगै भारतमा छोटो समयमै १ लाख युनिट एसयूभी उत्पादन गर्ने नयाँ रेकर्ड यो एसयूभीले बनाएको छ । पन्च अघिल्लो वर्षको अक्टोवर महिनामा लन्च भएको थियो ।

ग्लोवल एनक्यापको क्र्यास टेष्टमा ५ स्टार रेटिङ प्राप्त गर्न सफल यो एसयूभी सुरुवाती समयदेखी नै भारतको १० सर्बाधिक बिक्री हुने कारको सूचीमा पर्दै आइरहेको छ । अघिल्लो महिना हालसम्मकै सर्बाधिक बढी युनिट बिक्री भएको रेकर्ड बनाएको पन्च सो महिना ११ हजार ७ युनिट बिक्री भएको थियो ।

१.२ लिटर पेट्रोल इन्जिन जडित यो एसयूभी म्यानुअल र अटोमेटिक दुवै अप्सनमा उपलब्ध छ । यसको म्यानुअल ट्रान्समिसनले १८.८२ र अटोमेटिकले १८.९७ किलोमिटर माइलेल दिने दावी गरिएको छ । सानो एसयूभीमा धेरैभन्दा धेरै फिचर्स दिइएका कारण पनि यो एसयूभी भारतमा लोकप्रिय वनिरहेको हो ।

पन्चमा ७ इन्चको टचस्क्रिन, डिजिटल इन्स्ट्रयुमेन्ट क्लस्टर, अटोमेटिक हेडलाइट, २५ भन्दा बढी फिचर्स भएको कनेक्टेड कार टेक्नोलोजी, अटो एसी र क्रुज कन्ट्रोल लगायत फिचर्स दिइएको छ । एलइडी डिआरएलएस सहितको प्रोजेक्टर हेडल्याम्प, एलइडी टेल ल्याम्प, रेन सेन्सिङ वाइपर, अटोफोल्ड ओआरभिएमएस र १६ इन्चको डायमन्ट कट एलोई ह्विल्स लगायत फिचर्स समेत सामेल गरिएको छ ।

भारतमा लन्च भएलगत्तै नेपाली अटो पारखीले समेत प्रतिक्षा गरिरहेको यो एसयूभी नेपालमा भने हालसम्म भित्रिन सकेको छैन । भारतमै माग उच्च भएको कारण नेपाल आउन ढिलाइ भएको आधिकारिक वितरक सिप्रद्धी ट्रेडिङ स्रोतले बताउँदै आइरहेको छ । यसका वावजुत पनि कम्पनीले फेस्टिवल सिजनलाई लक्षित गरी यो एसयूभी नेपाल भित्राउने तयारी गरिरहेको थियो ।

तर विगत ३ महिनायता प्यासेन्जर कारको आयतमा पूर्ण प्रतिवन्ध लागु गरिएका कारण उक्त प्रतिवन्ध कायम रहुन्जेलसम्म यसको नेपाल आउने मिती अनिश्चित वनेको छ । संभवत प्रतिवन्ध हटेको केही समयपछि यो एसयूभी नेपाल आउने नै छ ।