बिक्रीमा उछिन्यो टाटा नेक्सनले ब्रेजालाई

भारतीय बजारमा सब ४ मिटर कम्प्याक्ट एसयूभी सेगमेन्टमा  मारुती सुजुकी ब्रेजाको अग्रता थियो । तर टाटा नेक्सनको बलियो पुनरागमन पछि ब्रेजालाई बिक्री चार्टमा पछि धकेल्न सफल भएको छ ।

गत नोभेम्बरमा टाटा नेक्सन भारतमा चौथो सबैभन्दा बढी बिक्री हुने कार थियो र यसलाई १५ हजार ३२९ ग्राहकले खरिद गरेका थिए । नेक्सनको बिक्री वार्षिक ३ प्रतिशतले बढेको छ । साथै अक्टोबरमा टाटा नेक्सन टप १० मा ९ औं स्थानमा थियो र यसको १४ हजार ७५९ युनिट बिक्री भएको थियो ।

मारुतीको लोकप्रिय सब-४ मिटर कम्प्याक्ट एसयूभी नोभेम्बरमा १४ हजार ९१८ ग्राहकले खरिद गरेका थिए र यो संख्या वार्षिक ११ प्रतिशतले बढेको हो। यो वर्षको अक्टोबरमा ब्रेजा चौथो स्थानमा थियो, तर नेक्सनले नोभेम्बरमा ब्रेजालाई छैटौं स्थानमा धकेल्यो। अक्टोबरमा ब्रेजा १६ हजार ५६५ ग्राहकले खरिद गरेका थिए र नोभेम्बरमा १६ सयभन्दा बढी युनिटले घटेकाले ब्रेजाको मासिक बिक्री घटेको छ ।

ब्रेजाको एक्स-शोरूम मूल्य ८ लाख ३४ हजार भारुबाट सुरु हुन्छ र १४ लाख १४ हजार भारुसम्म जान्छ। ब्रेजालाई पेट्रोलका साथै सीएनजी विकल्पमा पनि प्रस्तुत गरिएको छ र यो एसयूभी फिचरका साथै माइलेज पनि उत्कृष्ट छ । तर टाटा नेक्सन पेट्रोल र डिजेलका साथै सीएनजी र इलेक्ट्रिक भेरिएन्टमा प्रस्तुत गरिएको छ । आईसी इन्जिन भएको नेक्सनको एक्स-शोरूम मूल्य ८ लाख भारुबाट सुरु भएर १५ लाख ८० हजार भारुसम्म जान्छ । साथै नेक्सन ईभीको एक्स-शोरूम मूल्य १२ लाख ४९ हजार देखि १७ लाख १९ हजार भारुसम्म छ ।

नेपाली बजारमा कुनै समयमा निकै नै बिक्री हुने कारमा टाटा नेक्सन र नेक्सन ईभी थिए । अब भने नेक्सन ईभी फेसलिफ्टको प्रतीक्षा भइरहेको छ । अंग्रेजी नयाँ वर्षको शुभारम्भ पश्चात नेपाली बजारमा पनि सो ईभी उपलब्ध हुने अनुमान गरिएको छ ।