नेक्सन इभीमा भयो आगालागी, सुरक्षालाई लिएर वढ्यो चिन्ता

टाटा मोटर्सको लोकप्रिय इलेक्ट्रिक कार नेक्सनमा आगालागी भएको छ । मंगलबार मुम्वईमा भएको उक्त आगालागीपछि सेतो रङको सो गाडी जलेर पूर्णरुपमा नष्ट भएको छ । यो घटना के कसरी भयो भन्ने वारे यकिन तथ्य भने हालसम्म वाहिर आएको छैन ।

पछिल्ला दिन भारतमा इलेक्ट्रिक सवारीमा आगालागीको घटना बृद्धि भैरहेको छ । यसअघि ओला, सिम्पल वान प्योर इभी र ओकिनावा सहित अन्य थुप्रै ब्रान्डका इलेक्ट्रिक स्कुटरम आगालागी भएको थियो । उक्त घटनाले भारतमा यस्ता साधनको सुरक्षालाई लिएर गम्भिर चिन्ता व्यक्त हुँदै आइरहेको सन्दर्भमा भारतकै सर्वाधिक विक्री हुने नेक्सन इभीमा भएको यो घटनाले गम्भिर मोड लिन सक्ने आँकलन गरिएको छ ।

अगालागीको जानकारी पाउने वित्तिकै टाटा मोटर्सका प्रतिनिधीले उक्त घटनाको निरिक्षण गरी रिपोर्टिङ गरेको जनाइएको छ । यो घटनालाई आफूहरुले गम्भिर रुपमा अध्यायन गरिरहेको र अध्यायन पश्चात विस्तृत रिपोर्ट वाहिर ल्याउने कम्पनीको भनाई छ । नेक्सन इभीमा भएको यो घटनाको सत्यतथ्य वाहिर आएपछि ग्राहकको प्रतिक्रिया कस्तो रहला भन्ने विषयले यो कारको आगामी यात्रा तय हुने अनुमान गर्न सकिन्छ ।

नेक्सन इभी नेपाली बजारमा समेत सर्वाधिक माग हुँदै आएको इलेक्ट्रिक कार हो । यो कार हात पार्न अहिले पनि धेरै संख्यामा इभी पारखी प्रतिक्षारत छन् । माग वमोजिम आपूर्ती हुन नसकेपछि यो कारको अभाव कायमै छ । भारतमा भएको उक्त आगालागीको घटनाले नेपालमा यो कार प्रयोग गर्ने ग्राहकमाझ सुरक्षा चुनौती थपिएको छ ।