टाटाको नयाँ पुस्ताको नेक्सन: लन्चअघि नै लिक भयो टाटा नेक्सन २०२७ को इन्टेरियर

टाटा मोटर्सले नयाँ पुस्ताको नेक्सन २०२७ लन्च गर्ने तयारी गरिरहेको छ ।  आगामी पुस्ताको नेक्सनमा कम्पनीले बाहिरी डिजाइनदेखि इन्टेरियरसम्म उल्लेख्य परिवर्तन गर्ने अपेक्षा गरिएको छ।

लन्च हुनुअघि नै एउटा भिडियोमार्फत नयाँ पुस्ताको नेक्सनको इन्टेरियरको झलक लिक भएको छ। लिक भएको तस्बिर र  भिडियोमा देखिएको इन्टेरियर भने हालको नेक्सनसँग धेरै हदसम्म मिल्दोजुल्दो देखिन्छ। यसले टाटा मोटर्सले नयाँ पुस्तामा हालको मोडलको केही डिजाइन र लेआउटलाई निरन्तरता दिन सक्ने अनुमान गरिएको छ। यद्यपि, उत्पादनका लागि तयार हुने अन्तिम मोडलमा थप परिवर्तन हुन सक्ने सम्भावना पनि छ।

लिक भएको इन्टेरियरमा ड्यासबोर्डका धेरै भाग हटाइएको देखिन्छ भने इन्फोटेनमेन्ट स्क्रिन र सेन्टर कन्सोलका केही भाग मात्र स्पष्ट रूपमा देखिन्छ । क्लाइमेट कन्ट्रोल पनि नयाँ डिजाइनको हुन सक्ने अनुमान गरिएको छ। स्टेयरिङ ह्विल भने हालको नेक्सनमा प्रयोग भएको डिजाइनसँग मिल्दोजुल्दो देखिन्छ।

नयाँ नेक्सनको एक्सटेरियर डिजाइन हालको मोडलभन्दा निकै फरक डिजाइनको हुने अपेक्षा गरिएको छ। नयाँ पुस्ताको नेक्सनको साइड प्रोफाइल पहिलेभन्दा बक्सियर र अझ बढी एसयूभीजस्तो देखिनेछ। पावरट्रेनका लागि कम्पनीले यसको पेट्रोल, सीएनजी र डिजेल संस्करणमा ६ स्पिड म्यानुअल गियरबक्स उपलब्ध गराउने अपेक्षा गरिएको छ। नयाँ नेक्सनमा पनि हालकै १.२ लिटर टर्बो-पेट्रोल र १.५ लिटर टर्बो-डिजेल इन्जिन प्रयोग हुने अनुमान गरिएको छ।

नयाँ पुस्ताको नेक्सनमा सुविधाका हिसाबले पनि केही महत्वपूर्ण अपग्रेड हुने अपेक्षा गरिएको छ। पेट्रोल इन्जिन भएको नेक्सनमा इलेक्ट्रोनिक पार्किङ ब्रेक थपिन सक्ने सम्भावना छ। यसबाहेक डिजिटल इन्टेरियर रियर-भ्यु मिरर र क्यूएलईडी इन्फोटेनमेन्ट स्क्रिनजस्ता आधुनिक सुविधा पनि उपलब्ध हुन सक्ने अनुमान गरिएको छ। कम्पनीले नयाँ पुस्ताको मोडललाई थप प्रिमियम बनाउन इन्टेरियरको गुणस्तर र प्रविधिमा समेत सुधार गर्ने अपेक्षा गरिएको छ।