टाटा मोटर्सले भारतीय बजारमा ३ नयाँ इलेक्ट्रिक एसयूभी लन्च गर्ने

टाटा मोटर्सआफ्नो पोर्टफोलियो बलियो बनाउने योजनामा ​​छ । टाटाले अब ३ नयाँ इलेक्ट्रिक एसयूभी लन्च गर्ने भएको छ । सम्भवत: कम्पनीले यी इलेक्ट्रिक एसयूभी २०२५ मा लन्च गर्ने सम्भावना रहेको छ ।

टाटाले ह्यारियरको नयाँ ईभी लन्च गर्ने योजना बनाएको छ । सो एसयूभीको इन्टेरियरमा अपडेट गरिएको आईसीई संस्करण जस्तै ड्यासबोर्ड लेआउट हुनेछ । यसमा १२.३ इन्चको इन्फोटेनमेन्ट सिस्टम, वायरलेस चार्जर, वायरलेस स्मार्टफोन कनेक्टिभिटी, अटो होल्डसहितको इलेक्ट्रोनिक पार्किङ ब्रेक र ड्राइभ मोडका लागि रोटरी डायल समावेश हुनेछ। आईसीई संस्करण जस्तै, इलेक्ट्रिक ह्यारियरमा ठुलो प्यानोरामिक सनरुफ, डिजिटल इन्स्ट्रयुमेन्ट क्लस्टर, ब्लाइन्ड स्पट मोनिटरसहितको ३६० डिग्री क्यामेरा र लेभल २ एडास हुनेछ । यसमा रहेको ब्याट्रीले एक पटक चार्जमा ५०० किलोमिटरको रेन्ज दिने अनुमान गरिएको छ ।

टाटाले सफारी ईभी पनि लन्च गर्न लागेको छ । यसको डिजाइन पनि आईसीई मोडेलसँग साझा गर्नेछ । सफारी ईभीमा १२.३ इन्चको टचस्क्रिन इन्फोटेनमेन्ट सिस्टम, १०.२५ इन्चको डिजिटल ड्राइभर डिस्प्ले, ड्युअल जोन एसी, भेन्टिलेटेड फ्रन्ट र रियर सिट, प्यानोरामिक सनरुफ जस्ता फिचर हुनेछ । साथै ३६० डिग्री क्यामेरा, इलेक्ट्रोनिक स्टेबिलिटी कंट्रोल र एडास जस्ता सेफ्टी फिचर हुनेछ । टाटा सफारीको इलेक्ट्रिक भर्सन टाटाको नयाँ एक्टि डट ईभी प्लेटफर्ममा आधारित हुनेछ र यसले करिब ५०० किलोमिटरको रेन्ज प्रदान गर्नेछ ।

टाटाले सिएरा ईभी पनि लन्च गर्ने योजना बनाएको छ । यद्यपि यसको बारेमा कुनै आधिकारिक जानकारी छैन । तर रिपोर्टका अनुसार नयाँ टाटा सिएरा २०२५ को अन्त्य सम्ममा लन्च गर्ने अपेक्षा गरिएको छ ।

टाटा सिएरा ईभी ड्युअल मोटर एडब्ल्युडी सेटअपमा आउनेछ । यसमा ६० किलोवाट देखि ८० किलोवाटको ब्याट्री प्याकमा आउने सम्भावना छ। यसले सिंगल चार्जमा ५०० किलोमिटरभन्दा बढीको रेन्ज प्रदान गर्नेछ । यसको अधिकांश फिचर ह्यारियर वा सफारीबाट लिइएको छ ।