२०२४ मा रेकर्ड बिक्री गर्ने टाटा मोटर्सको अपेक्षा, कर्भसंगै ह्यारियर र पन्च पनि ईभी भर्सनमा आउने

टाटा मोटर्सले २०२४ मा नयाँ बिक्री रेकर्ड राख्ने अपेक्षा गरेको छ । कम्पनीका अनुसार ईभी र कम्वसन दुबै भर्सनमा नयाँ मोडलहरु लन्च हुने कारण वर्ष २०२४ अहिलेसम्मकै उत्कृष्ट हुनेछ ।

टाटा मोटर्स प्यासेन्जर भेहिकल एण्ड टाटा प्यासेन्जर इलेक्ट्रिक मोबिलिटीका प्रबन्ध निर्देशक शैलेश चन्द्रका अनुसार वर्ष २०२४ कम्पनीका लागी विशेष हुनेछ । उनले भने, ‘टाटा मोटर्सका लागी अर्को वर्ष थप आशाजनक हुने अपेक्षा गरेका छौँ । ईभी र कम्वसन दुबै भर्सनमा हामीले दुईदेखि तीनवटा नयाँ मोडलहरू थपेर हाम्रो पोर्टफोलियोलाई पूर्ण रूपमा परिमार्जन गर्दैछौं जसमा फेसलिफ्ट र नयाँ नेमप्लेट समावेश हुनेछन् ।’

चन्द्राले टाटा मोटर्सको बृद्धि उद्योगभन्दा छिटो हुने बताए । कम्पनीले २०२४ मा १० प्रतिशतले बिक्री बढाउन खोजिरहेको बताइएको छ । ५ प्रतिशतको वृद्धिका साथ टाटाले २०२३ मा ५ लाख ५० हजार युनिट बिक्री गर्ने अपेक्षा गरेको छ ।

टाटा मोटर्सले हालसालै ह्यारियर र सफारीलाई अपडेट गर्नुको साथै नेक्सन र नेक्सन ईभीको फेसलिफ्ट सार्बजनिक गरेको छ । साथै कम्पनीले ह्यारियर र पन्चलाई सोही वर्ष ईभी भर्सनमा उताने तयारी थालेको छ भने कर्भ ईभीलाई पनि २०२४ भित्रै बिक्री सुरु गर्ने तयारी गरिरहेको छ ।

सन् २०२६ सम्ममा १० नयाँ मोडलका ईभी आफ्नो लाइनअपमा थप्ने कम्पनीको योजना छ ।