ईभीमा ध्यान केन्द्रित गर्दै टाटा मोटर्स, पाँच बर्षपछि २५ प्रतिशत हिस्सा पु-याउने तयारी

इलेक्ट्रिक भेइकलको माग बिश्वब्यापी रुपमा बढ्दै गएपछि अहिले बिश्वका ठूला अटो उत्पादकहरु यस्ता सवारीसाधन उत्पादनमा केन्द्रित हुन थालेका छन् । कमर्सियल भेइकलमा बिश्वभर लोकप्रिय टाटा मोटर्सले प्यासेन्जरक कार उत्पादनमा आक्रमक मुभ दिन थालेसंगै हाल उसको जोड इलेक्ट्रिक कारमा समेत केन्द्रित हुँदै गएको छ ।

भारतीय बजारमा इलेक्ट्रिक कारको माग उच्च गतिमा बढ्दै गएपनि ठूला उत्पादकहरुले यसमा खासै जोड दिन नसकेपछि टाटाले यो सेग्मेन्टमा उज्वल भबिष्य देखेर ध्यान केन्द्रित गर्न थालेको हो ।

टाटा मोटर्सले केही समय अघि सार्बजनिक गरेको नेक्सन ईभीले भारतीय बजारमा अत्याधिक सफलता पाएपछि नयाँ उत्पादन थप्न कम्पनी झनै हौसिएर लागिपरेको छ । परिणामस्वरुप उसले हालसालै कम्प्याक्ट सेडान टिगोरलाई समेत ईभी भर्सनमा उतारिसकेको छ । कम्पनीका प्यासेन्जर भेइकल बिजनेस युनिटका अध्यक्ष सैलेश चन्द्रका अनुसार अबको ५ बर्षभित्र टाटाले १० भन्दा बढी नयाँ ईभीलाई बजारमा उतारिसक्ने दाबी गरेका छन् । पाँच बर्षपछि टाट मोटर्सको कुल बिक्रीको २५ प्रतिशत हिस्सा ईभीले ओगट्ने उनको भनाई छ ।

आगामी दिनमा ब्याट्रिको मूल्यमा समेत भारी गिरावट आउने र इलेक्ट्रिक कारको मुल्य क्रमिक रुपमा कम हुँदै जाने उनको भनाई छ । अटोकार इन्डियासंगको कुराकानीमा उनले भने, ‘ नयाँ नम्र्सका कारण हाल कारोबार हुँदै आइरहेको इन्टर्नल कम्बस्टन इन्जिनयुक्त कारको मुल्य क्रमिक रुपमा बढ्दो छ भने उता ईभीमा प्रयोग हुने ब्याट्रिको मूल्य घट्दो क्रममा रहेका कारण भोलीका दिनमा इलेक्ट्रिक कारको मूल्य कम हुने आधारहरु देखा परेका छन् । जसका कारण भोलिका दिनेमा यस्ता कारको मगमा क्रमिक बृद्धि हुँदैजाने निश्चित छ ।’

बजारको माग धान्न टाटा मोटर्सले तत्कालका लागी हाल कारोबार हुँदै आइरहेको इन्टर्नल कम्बसन इन्जिनयुक्त कारलाई नै ईभी भर्सनमा उतार्दै जानी रणनिती टाटा मोटर्सले बनाएको छ । सोही रणनिती अन्तर्गत नै कम्पनीले नेक्सन र टिगोर मोडललाई ईभीमा रुपान्तरण गरेको हो । तत्कालै नयाँ मोडलको ईभीलाई बजारमा नउतारीहाल्ने समेत उनले बताएका छन् ।