ईभी बिक्री गर्न टाटाले संचालनमा ल्यायो छुट्टै ‘डेडिकेटेड’ शोरुम, नेपालमा कहिलेदेखी ?

काठमाडौं– टाटा मोटर्सले भारतमा ईभीको छुट्टै डेडिकेटेड शोरुम संञ्चालनमा ल्याएको छ । टाटा मोटर्सको सहायक कम्पनी टाटा प्यासेन्जर इलेक्ट्रिक मोबिलिटीले सेक्टर १४ र सोहना रोड, गुरुग्रामको अटो हबमा आफ्नो टाटा डट इभी शोरुम सुरू गरेको हो । कम्पनीले टाटा डट इभी शोरुमहरु २०२४ को जनवरी ७ देखि सर्वसाधारणका लागि खोल्ने योजना बनाएको छ ।

परम्परागत पेट्रोलियम गाडीको तुलनामा ईभीको छुट्टै विशेषता हुने र ग्राहकले पनि ईभी खरिद गर्दा शोरुममा फरकपनको अनुभब गर्न सकुन भनेर नयाँ डेडिकेटेड शोरुम संचालनमा ल्याइएकोे टाटा मोटर्सले जनाएको छ । ईभी उत्पादनमा निकै नै आक्रमक देखिएको टाटा भारतको सबैभन्दा ठूलो उत्पादक र सर्बाधिक बजार हिस्सा सहित अग्रणी स्थानमा रहँदै आएको छ ।

सो ईभी डेडिकेटेड शोरुममा इभी खरिद गर्नु अगाडि सबै ग्राहकहरुसँग छुट्टै खालको कुराहरु सेयरिङ गर्ने र कफी पनि खान सकिने फ्रेन्डली वातावरण प्रदान गरिएको छ । साथै नयाँ शोरुमले टाटा ब्राण्डको ईभीमा ग्राहकको विश्वास बढाउन मद्धत गर्ने बताइएको छ ।

भारतमा टाटाले ईभीका लागी छुट्टै डेडिकेटेड शोरुम संचलान गर्न थालेपछि यसको प्रभाव नेपाल लगायत अन्य राष्ट्रमा पनि पर्ने देखिएको छ । बिक्रेता कम्पनीहरुले विस्तारै ईभी र कम्वसन दुवै गाडीका लागी फरक–फरक शोरुम निर्माण गर्नुपर्ने अबस्था सिर्जना हुन सक्ने टाटा गाडीको नेपालका लागि आधिकारिक वितरक सिप्रदी ट्रेडिङ स्रोतले जनाएको छ ।

उक्त स्रोतका अनुसार टाटा मोटर्सबाट हालसम्म कुनै जानकारी नआएपनि विस्तारै नेपाली बजारमा पनि ईभीका लागी छुट्टै डेडिकेटेड शोरुम निर्माण गर्नुपर्ने अबस्था सिर्जना हुन सक्नेछ ।