टाटा पन्च ईभीको फेसलिफ्ट भर्सन सार्बजनिक, यस्तो छ विशेषता

टाटाले आफ्नो लोकप्रिय इलेक्ट्रिक एसयूभी पन्च ईभीको फेसलिफ्ट संस्करण सार्बजनिक गरेको छ । लन्च भएको दुई वर्ष नपुग्दै कम्पनीले पेट्रोल पन्च फेसलिफ्टसँग मेल खाने गरी इलेक्ट्रिक भर्सनलाई पनि अपडेट गरेको हो ।

नयाँ पन्च ईभीको डिजाइन हालै सार्वजनिक गरिएको पेट्रोल पन्च फेसलिफ्टसँग मिल्दोजुल्दो रहेको छ । अगाडिको भागमा पुनः डिजाइन गरिएका एलईडी डीआरएलसहितका हेडलाइट र नयाँ बम्पर दिएको छ । साइड प्रोफाइलमा नयाँ एरो अप्टिमाइज्ड अलोय ह्विल राखिको छ भने पछाडिको भागमा नयाँ एलईडी लाइट बार र परिमार्जित बम्पर देख्न सकिन्छ।

नयाँ पन्च ईभीमा नेक्सन ईभीमा जस्तै ठूलो १२.३ इन्चको टचस्क्रिन इन्फोटेन्मेन्ट सिस्टम उपलब्ध गराइएको छ । यसका साथै ३६० डिग्री क्यामेरा, भेन्टिलेटेड सिट, वायरलेस चार्जिङ, डिजिटल ड्राइभर डिस्प्ले र सनरुफजस्ता आधुनिक सुविधाहरू पनि समावेश गरिएको छ ।

ब्याट्री र पावरट्रेनतर्फ भने कुनै परिवर्तन गरिएको छैन । यसमा पहिले झैं दुईवटा ब्याट्री विकल्प उपलब्ध गराइएको छ । सानो २५ किलोवाट आवरको ब्याट्री प्याकले सिंगलचार्जमा २६५ किलोमिटरको रेन्ज दिनेछ भने ठूलो ३५ किलोवाट आवरको ब्याट्री प्याकले ३६५ किलोमिटर हाराहारी रेन्ज प्रदान गर्नेछ ।

फेब्रुअरी २०, २०२६ मा औपचारिक रूपमा लन्च गरिने यसको मूल्य हालको मोडलभन्दा करिब २० देखि ३० हजार भारुसम्म बढी हुन सक्ने अनुमान गरिएको छ । फेसलिफ्ट संस्करणले भारतमा सिट्रोन ईसी३ र एमजी विन्डसर जस्ता इलेक्ट्रिक कारसँग प्रतिस्पर्धा गर्ने अनुमान गरिएको छ ।