टाटा कर्भ ईभीद्वारा कश्मीर देखि कन्याकुमारी सम्म सबैभन्दा छिटो ड्राइभको रेकर्ड कायम

टाटा कर्भ ईभीले भारतको कश्मीर देखि कन्याकुमारी सम्मको ३ हजार ८२३ किलोमिटरको दुरी ७६ घण्टा ३६ मिनेटमा पार गरेर सबैभन्दा तीव्र गतिमा दुरी पार गर्ने ईभी अर्थात ईभी ड्राइभको इतिहास कायम गरेको छ ।

हाल सम्मको रेकर्ड अनुसार टाटाकै नेक्सन ईभी म्याक्सको नाममा यो रेकर्ड कायम थियो । सो रेकर्ड भन्दा कर्भ ईभीले १९ घण्टा कम समयमा सो दुरी पार गरेको हो । यो वाहेक कर्भ ईभीले अन्य २० राष्ट्रिय रेकर्ड समेत कायम गरेको छ ।

सो महत्वपूर्ण यात्राका लागि कर्भ ईभीले १६ चार्जिङ स्टपको प्रयोग गरेको थियो । पहिले औसत चार्जिङ समय २८ मिनेट भएकोमा अब यो घटेर १७ मिनेट मात्र भएको छ । यसले भारतमा बढ्दो चार्जिङ नेटवर्क र ब्याट्री प्रविधिलाई समेत दर्शाएको छ ।

केटुके रनका लागि आयोजित कार्यक्रम अन्तर्गत टाटा कर्भ ईभीले सो रेकर्ड कायम गरेको हो । जम्मु कश्मीरका मुख्यमन्त्री उमर अब्दुल्लाद्वारा शुभारम्भ गरिएको सो कार्यक्रम फेब्रुअरी २५ मा सुरु भएर फेबु्रअरी २८ मा सकिएको थियो ।

एक्टि.ईभी प्योर ईभी आर्किटेक्चर र ५५ किलोवाट ब्याट्री प्याकयुक्त टाटा कर्भ ईभीले सो चुनौतीपूर्ण यात्रा पार गरेको हो ।

टाटा कर्भ ईभी हालै मात्र नेपाली बजारमा सार्वजनिक गरिएको छ । नेपालका लागि टाटा मोटर्सको आधिकारिक वितरक सिप्रदी ट्रेडिङ प्रालिले ल्याएको कर्भ ईभीले सिंगल चार्जमा ५०२ किलोमिटर रेन्ज दिने बताइएको छ । नेपालका लागि कम्पनीले यसको टेस्टिङ रेन्ज ३८० किलोमिटर भनेको छ ।

यसमा ९८ किलोवाटको मोटर रहेको छ । यसलाई इको, सिटी र स्पोर्ट मोडमा ड्राइभ गर्न सकिन्छ । यसको लम्बाई, चौडाई र उचाई क्रमशः ४३१०, १८१० र १६३७ एमएम रहेको छ भने ह्विलबेस २५६० एमएम छ । १८६ एमएमको ग्राउन्ड क्लियरेन्स रहेको टाटा कर्भ ईभीमा ५०० लिटरको बुट स्पेस छ भने टर्निङ रेडियस ५.३५ मिटर छ ।

टाटा कर्भ ईभीको मूल्य नेपाली बजारमा ५६ लाख ९९ हजार रुपैयाँ तोकिएको छ ।