टेल्जीमा प्रयोग गरिने ब्याट्रीका लागि बीवाईडी र टेल्जीले सहकार्य गर्ने

चाइनिज ईभी तथा ब्याट्री निर्माता कम्पनी बीवाईडीले चाइनिज टु ह्विलर जायन्ट टेल्जीका इलेक्ट्रिक मोटरसाइकल, ई–बाइक तथा स्कुटरका लागि ब्याट्री विकासमा सहकार्य गर्ने भएको छ । टेल्जीले सार्वजनिक गरेको जानकारी अनुसार बीवाईडीसँग यसरी सहकार्य गर्ने पहिलो दुई पांग्रे सवारी निर्माता कम्पनी टेल्जी बनेको छ ।

सोमबार टेल्जीले आफ्नो नयाँ उत्पादन लन्च गर्न आयोजित कार्यक्रममा सो नयाँ सहकार्यको समेत जानकारी प्रदान गरिएको हो । टेल्जीले एक प्रेस विज्ञप्ति समेत सार्वजनिक गर्दै टु ह्विलर ब्याट्री प्रविधिमा रहेका चुनौतीहरुलाई सामना गर्नका बीवाईडी ब्याट्रीको प्रयोग गर्ने तयारी अनुसार कार्य गर्ने बताएको छ । दुवै कम्पनी मिलेर ब्याट्रीको सुरक्षामा समेत सुधारात्मक कार्य गर्ने बताइएको छ ।

टेल्जी पनि बीवाईडी जस्तै चीनको सेन्झेनमा अवस्थित छ र चीनको सर्बाधिक ठुलो दुई पांग्रे सवारी निर्माता कम्पनी मध्ये एक हो । १ करोड ५० लाख युनिट उत्पादन क्षमता भएको टेल्जीले विश्वका ९० भन्दा बढी देश र क्षेत्रमा रहेका ३० हजार स्टोरमार्फत उत्पादन बिक्री गरिरहेको छ । कम्पनीले हालै भियतनाम र इन्डोनेसियामा आरएन्डडी सेन्टर खोलेको छ ।

नेपाली बजारमा समेत टेल्जीका विद्युतीय स्कुटर उपलब्ध छन् । नेपालमा योम मा ई मोटर्सले टेल्जीका विद्युतीय स्कुटर बिक्री–वितरण गरिरहेको छ ।

ईभी र ब्याट्री निर्माता कम्पनीको रुपमा परिचित बीवाईडी चाहिं सीएटीएल पछि दोस्रो ठुलो ब्याट्री निर्माता कम्पनीको रुपमा परिचित छ ।

नेपालमा साइमेक्स इंकले बीवाईडीका विद्युतीय गाडी बिक्री–वितरण गरिरहेको छ । विश्वमै लोकप्रिय मानिने बीवाईडीका गाडी नेपाली बजारमा समेत लोकप्रिय छन् ।