नेपालमा भित्रियो एसवाईएमको एड्भेन्चर डर्ट बाइक एनएचटी २००, यस्तो छ मूल्य र विशेषता

काठमाडौं – नेपाली बजारमा एसवाईएमको एड्भेन्चर डर्ट बाइक एनएचटी २०० भित्रिएको छ । नेपालका लागि आधिकारिक वितरकको रुपमा केजी इन्टरनेसनलले यो बाइक उपलब्ध गराएको हो ।

गत बैशाख महिनामै यो बाइक नेपाली बजारमा उपलब्ध हुने घोषणा गरिएको थियो । तर निषेधाज्ञाका कारण रोकिएको थियो । अब कमलपोखरीस्थित सोरुम पुगेर यसको टेस्ट राइड गर्न सकिने कम्पनीले जानकारी दिएको छ ।

यो बाइकको मूल्य ५ लाख ४८ हजार ८८८ रुपैयाँ तोकिएको छ । केही दिनमै भर्चुअल लन्चमार्फत यो बाइक नेपालमा भित्रिएको औपचारिक जानकारी गराइने केजी इन्टरनेसनलले जनाएको छ ।

यो बाइकमा युरो फोर, १८३ सीसी फोर स्ट्रोक लिक्विडकुल्ड इन्जिन छ, जसले ८५०० आरपीएममा १३.५ किलोवाट पावर र ७५०० आरपीएममा १५.७ एनएम टर्क जेनेरेट गर्छ । इलेक्ट्रोनिक फ्युल इन्जेक्सन सिस्टम रहेको सो बाइकको फ्रन्टमा टेलिस्कोपिक फोर्क सस्पेन्सन र रियरमा युनिट स्विङ आर्म रहेको छ ।

६–स्पिड गियरबक्समा उपलब्ध सो बाइकको अधिकतम स्पिड १२५ किमी प्रतिघण्टा रहेको छ । सिटको उचाई ८१० एमएम रहेको सो बाइकमा १३ लिटरको इन्धन ट्यांकी छ । सुविधायुक्त सिट, एलसीडी डिस्प्ले, फ्रन्ट तथा रियर डिस्क ब्रेक, रोबस्ट च्यासिस तथा फुल एलईडी लाइट रहेको छ ।

अर्वान एक्सप्लोरका लागि डिजाइन गरिएको यो बाइक क्रसओभर एड्भेन्चर कलेक्सन हो । अगाडिको भिजिबिलिटी क्लियर देखिनका लागि यसमा भएको केही अपराइट राइडिङ पोस्चरले सहयोग गर्छ । त्यसैगरी बाइकमा भएको पेरिमिटर फ्रेम, सेन्टर सस्पेन्सन र सीबीएस सहितको फ्रन्ट तथा रियर डिस्क ब्रेकले आउटस्ट्यान्डिङ ह्यान्डलिङमा सहयोग गर्छ ।

बाइकमा भएको बिक र भाइजरले यसको एड्भेन्चर लुकलाई थप परिस्कृत बनाएको छ । फ्रन्टमा भएको १४० एमएम ट्राभल सस्पेन्सनले धेरै टेरेनहरुको यात्रामा सहयोग गर्छ ।

नेपाली बजारमा यो भन्दा पहिले पनि एसवाईएमका बाइक र स्कुटर भित्रिसकेका थिए । यद्यपि विभिन्न कारणले राम्रो बजार लिन नसक्दा बन्द हुन पुगेका थिए । केजी इन्टरनेसनल पनि नेपालमा अटोमोबाइल सम्बद्ध व्यवसायीहरुको समूह हो ।