एरिना लाइनअपको फ्ल्यागशिप मोडलका रुपमा आयो सुजुकी भिक्टोरिस, यस्तो छ विशेषता

मारुति सुजुकीले भिक्टोरिस नामक आफ्नो नयाँ मिडसाइज एसयूभी सार्वजनिक गरेको छ । ब्रान्डको एरिना लाइनअपको फ्ल्यागशिप मोडेलका रुपमा आएको यस नयाँ एसयूभीले हुन्डाई क्रेटा, किया सेल्टोस र होन्डा एलिभेट जस्ता एसयूभीसंग प्रतिस्पर्धा गर्नेछ ।

भिक्टोरिसको समग्र डिजाइन ई–भिटाराबाट प्रेरित छ । यसमा क्रोम स्ट्रिपद्वारा जोडिएको क्रिस्प एलईडी डीआरएलहरू सहित स्लिम एलईडी हेडल्याम्म राखिएको छ । एसयुभीको चारैतिर कालो बडी क्ल्याडिङ र सिल्भर स्किड प्लेटहरू सहित चंकी बम्पर दिइएको छ । साथै, यसमा १८ इन्चको डुअल–टोन अलाेय ह्विल उपलब्ध छ ।

भिक्टोरिसको इन्टेरियरमा वायरलेस एन्ड्रोइड अटो र एप्पल कारप्ले कनेक्टिभिटीको साथ १०.२५ इन्चको सेन्ट्रल टचस्क्रिन र डल्बी एटमसका साथ ८–स्पीकर इन्फिनिटी बाइ हर्मन साउन्ड सिस्टम रहेको छ । एसयूभीमा ८ तरिकाले एड्जस्ट गर्न मिल्ने ड्राइभर सिट, एम्बियन्ट लाइटिङ, अटोमेटिक क्लाइमेट कन्ट्रोल, प्यानोरामिक सनरुफ, वायरलेस चार्जर, पावर्ड टेलगेट, हेड–अप डिस्प्ले सहितको १०.२५ इन्चको डिजिटल इन्स्ट्रुमेन्ट क्लस्टर र भेन्टिलेटेड फ्रन्ट सिट पाउन सकिन्छ ।

यस एसयुभीमा सुजकीले लेभल २ एडास प्रदान गरेको छ, जुन यो फिचर पाउने पहिलो मारुती सुजुकी कार पनि हो । सुरक्षाको कुरा गर्दा एसयुभीमा ६ वटा एयरब्याग, इबीडी सहितको एबिएस, ट्रयाक्सन कन्ट्रोल, हिल होल्ड कन्ट्रोल, ३६०–डिग्री क्यामेरा र टायर प्रेसर मोनिटरिङ सिस्टम सामेल गरिएको छ । यस कारले भारत एनक्यापमा ५ स्टार रेटिङ पाएको छ ।

पावरट्रेनको कुरा गर्नुपर्दा, भिक्टोरिस १.५–लिटर माइल्ड–हाइब्रिड पेट्रोल इन्जिन, १.५–लिटर स्ट्रङ–हाइब्रिड र सिएनी संस्करणमा उपलब्ध हुनेछ । ५–स्पीड म्यानुअल र ६–स्पीड अटोमेटिक ट्रान्समिसनको विकल्प पाइने भिक्टोरिसको स्ट्रङ–हाइब्रिड संस्करणमा भने ईसिभिटी हुनेछ । साथै, यसको केही भेरिएन्ट अल–ह्वील ड्राइभमा पनि उपलब्ध हुनेछ ।

कुल ६ भेरिएन्टमा उपलब्ध हुने यस एसयुभीको मूल्य भने सार्बजनिक गरिएको छैन ।