टियागो ईभीसंग प्रतिस्पर्धा गर्न सुजुकीले नयाँ मोडल ल्याउने

मारुती सुजुकीले भारतीय बजारको लागि कम लागतको इलेक्ट्रिक ह्याचब्याक विकास गरिरहेको छ । कोडनेम वाई२भी मा उत्पादन हुन लागेको सो नयाँ मोडल मारुतीद्वारा स्थानीय रूपमा डिजाइन र विकास गरिएको पहिलो ईभी हुने जनाइएको छ ।

सुजुकी ईडब्लुएक्स अवधारणामा आधारित रहने सो ईभी सन् २०२८ सम्ममा उत्पादनमा जाने मिडिया रिपोर्टमा उल्लेख गरिएको छ ।

वाईटुभी इलेक्ट्रिक ह्याचब्याकको प्राविधिक विवरणहरू अझै सार्बजनिक नभएपनि यो ३५ किलोवाट आवर ब्याट्रीद्वारा संचालन हुने अनुमान गरिएको छ । जुन ई–भिटाराको लगभग आधा क्षमता हो ।

ईन्ट्रि लेभल सेग्मेन्टको सो नयाँ ईभीले टाटा टियागो र एमजी कोमेट ईभीसंग प्रतिस्पर्धा गर्नेछ । सो नयाँ कारलाई मारुती सुजुकीले ५ वर्षभित्र २ लाख ५० हजार युनिट उत्पादन गर्ने लक्ष्य लिएको छ ।

मारुती सुजुकीले यस वर्षको अन्त्यमा आफ्नो पहिलो प्योर–इलेक्ट्रिक मोडल ई–भिटारा लन्च गर्ने तयारी गरिरहेको छ । कम्पनीले सन् २०३१ सम्ममा ६ वटा नयाँ ईभी लन्च गर्ने यसअघि नै उद्घोष गरेको थियो ।