सुजुकीको नयाँ क्रसओभर फ्रंक्स, यस्तो छ विशेषता

मारुती सुजुकीले भारतमा जारी अटो एक्सपो २०२३ मा नयाँ क्रसओभर फ्रंक्स सार्वजनिक गरेको छ । हालको वलेनो ह्याचव्याकलाई क्रसओभर डिजाइन दिएर तयार पारेको यो नयाँ एसयूभीको वुकिङ समेत खुल्ला गरिएको छ । यसको मूल्य भने हालसम्म सार्वजनिक गरिएको छैन ।

सुजुकीले यो नयाँ क्रसओभरलाई हर्टटेक्ट प्लेटफर्ममा निर्माण गरेको हो । जसको लम्वाई ३९९५ एमएम, चौडाई १६६५ एमएम र उचाई १५५० एमएम तथा ह्विलवेश २५२० एमएम रहेको छ । यसको फ्रन्ट फेसिया ग्रान्ड भिटराबाट प्रेरित रहेको देख्न सकिन्छ । जहाँ भिटराको जस्तै एलइडी डे टाइम रनिङ लाइट सहितको ठूलो ग्रिल जडान गरिएको छ ।

फ्रंक्सको इन्टेरियरलाई डुअल टोन कलरमा सजाइएको छ । यसमा ९ इन्चको टचस्क्रिन इन्फोटेन्मेन्ट सिस्टम, वायेरलेस चार्जिङ, ६ वटा एयरव्याग, क्रुज कन्ट्रोल, ३६० डिग्री क्यामेरा र हेड्स अप डिस्प्ले सहित ४० भन्दा वढी कनेक्टेड कार फिचर दिइएको छ ।

यो नयाँ क्रसओभरलाई सुजुकीले दुई वटा इन्जिन अप्सनमा उतारेको छ । जसमध्ये एउटामा १.० लिटर टर्वो पेट्रोल इन्जिन र अर्कोमा १.२ लिटर पेट्रोल इन्जिन दिइएको छ । यसको टर्वो पेट्रोलले ९९ विएचपी पावर र १४७ एनम टर्क तथा पेट्रोल इन्जिनले ८९ एचपी पावर र ११३ एनएम टर्क जेनेरेट गर्छ । यो ५ स्पिड म्यानुअल र ६ स्पिड अटोमेटिक ट्रान्समिसनमा उपलब्ध छ ।