ईभी लभरका लागि अर्को खुसी : सेकेन्डमै चार्ज हुने सोडियम आयोन ब्याट्रीको विकास

कोरियाको एड्भान्स्ड इन्स्टिच्युट अफ साइन्स एन्ड टेक्नोलोजीका अनुसन्धानकर्ताहरुले हाई पावर हाइब्रिड सोडियम आयोन ब्याट्री विकास गरेका छन्, जुन सेकेन्डमै चार्ज गर्न सकिन्छ ।

हाल इलेक्ट्रिक सवारी साधनमा प्रयोग गरिने ब्याट्रीका लागि आवश्यक लिथियम भन्दा सोडियम एक हजार गुणा बढी उपयुक्त मानिन्छ ।

त्यसकारण परम्परागत लिथियम आयोन इलेक्ट्रोकेमिकल इनर्जी स्टोरेज भन्दा सोडियम आयोन इलेक्ट्रोकेमिकल इनर्जी स्टोरेज डिभाइस बढी आकर्षक मानिन्छ ।

इन्स्टिच्युटको डिपार्टमेन्ट अफ मेटरियल साइन्स एन्ड इन्जिनियरिङका प्रोफेसर ज्युङ कु काङको नेतृत्वमा रहेको रिसर्च टिमले ब्याट्रीहरुमा प्रयोग गरिने एनोड मेटरियललाई सुपर क्यापासिटरका लागि उपयुक्त क्याथोडसँग एकीकृत गरेको थियो ।

डिजाइनका आधारमा सोडियम आयोन ब्याट्री परम्परागत लिथियम आयोन ब्याट्री जस्तै समान छन् । तर क्याथोडमा लिथियम आयोनको स्थानमा सोडियम आयोन प्रयोग गरिन्छ । यसमा लिथियम लवणको स्थानमा सोडियम लवण राखिएको हुन्छ । त्यसैगरी लिथियम आयोन भन्दा सोडियम आयोन ब्याट्री उपयुक्त, सस्तो र सुरक्षित समेत छन् ।

साइन्स डिरेक्ट नामक जर्नलमा यस सम्बन्धी रिसर्च प्रकाशित भएको छ । भविष्यमा यो ब्याट्री व्यावहारिक रुपमा प्रयोगमा आएमा इलेक्ट्रिक सवारी साधन अर्थात ईभी चलाउनेहरुले लामो समय सम्म ब्याट्री चार्ज गर्नुपर्ने झन्झटबाट मुक्ति पाउने छन् र ईभीको प्रयोग अझै बढेर जाने अनुमान गर्न सकिन्छ ।