तपाईंको स्मार्ट ड्राइभिङ लाइसेन्स छापियो ? अब नागरिक एपमै हेर्न सकिने

काठमाडौँ - सवारी चालक अनुमतिपत्र अर्थात क्यूआरयुक्त ड्राइभिङ लाइसेन्स छापिए वा नछापिएको जानकारी अब नागरिक एपमार्फत हेर्न सकिने भएको छ । हालै नयाँ प्रणाली अनुसार लाइसेन्स छापिन प्रारम्भ भए पश्चात नागरिक एपको नयाँ अपडेट भर्सनमा सो जानकारी उपलब्ध हुन थालेको हो ।

हाल नागरिक एपको नयाँ अपडेट भर्सन अर्थात भर्सन २.०.९५ आएको छ । नागरिक एप खोल्दा सो नयाँ एप भर्सनमा अपडेट भए पश्चात यसलाई खोल्दा यदि लाइसेन्स छापिएको छ भने “तपाईंको सवारी चालक अनुमतिपत्र छापिएको छ, कृपया सम्बन्धित कार्यालयबाट लिनुहोस्” भन्ने सूचना स्क्रिनमा देखिन्छ ।

कार्ड नछापिएको अवस्थामा भने कुनै पनि सूचना देखिँदैन । हाल यो फिचर एन्ड्रोइड प्रयोगकर्ताका लागि मात्र उपलब्ध छ । आईओएसमा पनि छिट्टै आउने बताइएको छ ।

सुरक्षण मुद्रण केन्द्रले छापेका लाइसेन्सहरू यातायात व्यवस्था विभागले वितरणका लागि सम्बन्धित कार्यालयहरूमा पठाउन थालेसँगै नागरिक एपमा यो सुविधा उपलब्ध भएको हो ।

नागरिक एपमा कार्ड छापिएको सूचना प्राप्त गरेपछि सेवाग्राही लाइसेन्स संकलन गर्न स्वयं यातायात कार्यालयमा उपस्थित हुनुपर्नेछ । कार्यालयमा जाँदा नयाँ लाइसेन्स लिने सेवाग्राहीले राजस्व भुक्तानी गरेको सक्कल रसिद अनिवार्य रूपमा बुझाउनुपर्नेछ । यसैगरी, लाइसेन्स नवीकरण गरेकाहरूको हकमा भने नयाँ कार्ड लिन जाँदा पुरानो लाइसेन्स कार्ड अनिवार्य रूपमा साथमै लिएर जानुपर्ने व्यवस्था छ ।

विभाग र सुरक्षण मुद्रण केन्द्रबिच गत १२ कात्तिक २०८२ मा भएको सम्झौताअनुसार १२ लाख क्यूआर कोडमा आधारित लाइसेन्सको छपाइ कार्य पूर्ण रूपमा सम्पन्न भइसकेको छ । ३० चैतसम्ममा तीमध्ये छ लाख ७० हजार कार्ड सम्बन्धित कार्यालयमा पठाइएको विभागले जनाएको छ ।